Социальнай остолобуойга көмөлөһөн, Өрөспүүбүлүкэтээҕи волонтердар кииннэрэ кырдьаҕастарга, инбэлииттэргэ босхо эбиэттэри дьиэлэригэр тиэрдэн биэриэхтэрэ.
edersaas.ru
— Биһиэхэ сүрүннээн ыарахан балаһыанньаҕа түбэспит дьон сылдьаллар. Бу — кыаммат, соҕотох олорор биэнсийэлээхтэр, инбэлииттэр, элбэх оҕолоох аҕалар, ийэлэр, аҥаардас төрөппүттэр, баһаарга, халааҥҥа эмсэҕэлээбит дьон. Кинилэр үөскээбит балаһыанньанан, дьиэҕэ олорорго күһэлиннилэр. Онон волонтердартан көрдөспүппэр, дьиэлэригэр тиэрдэн биэрэргэ сөбүлэстилэр, кинилэргэ махтанабын.
Социальнай остолобуой тэриллиэҕиттэн 23 тыһыынча босхо эбиэти бэлэмнээбитэ. Бүгүн 20 эбиэти тиэртибит. Менюга борщ, эттээх мокоруон, оҕуруот аһыттан салаат, минньигэс бөрүөк, килиэп баар. Хас күн аайы саҥа менюну оҥоробут, бүлүүдэлэрбит хатыласпаттар, — диэн остолобуой салайааччыта Ирина Гузова иһитиннэрдэ.
Остолобуойга бэтэрээннэри чиэстээһин.
Социальнай остолобуойу 2017 сыллаахха “Графский берег” кафе хаһаайката, урбаанньыт Ирина Гузова куорат дьаһалтатын, Промышленнай уокурук управлениетын, социальнай көмүскэл управлениетын, Дьокуускайдааҕы епархия өйөбүллэринэн, арыйбыта.
Менюга миин, торуой, салаат, хомпуот баар буолар. Сылдьыбыт дьон астара минньигэһин, үлэһиттэр эйэҕэстэрин бэлиэтииллэр. Дьону аһаталларын таһынан, Саҥа дьыл, Кыайыы күнүн, Пасха, ыһыах бырааһынньыктарын тэрийэллэр.
Ангелина Васильева, “Саха сирэ” хаһыат, edersaas.ru
Хаартыска: Сахалайф.