Социалистическай Үлэ Дьоруойа Афанасий Степанов төрөөбүтэ 100 сылын бэлиэтээтилэр
Мэҥэ Хаҥалас улууһун АПК бэтэрээннэрэ, тыа хаһаайыстыбатын тэрилтэлэрин салайааччылара уонна үлэһиттэрэ, үөрэнээччилэр уонна улуус олохтоохторо Афанасий Степанов пааматынньыгар сибэкки уурдулар. Бу туһунан СӨ тыатын хаһаайыстыбатын министиэристибэтин пресс-сулууспата иһитиннэрэр.
edersaas.ru
Сүөһү иитиитин, племенной кэтээн көрүү, кэпэрээссийэ уонна дьоҕус хаһаайыннааһын департаменын салайааччыта Артем Александров Афанасий Степанов өрөспүүбүлүкэ холкуостарыгар көрдөрбүт ситиһиитин, оруолун сырдатта. Афанасий Егорович сылгыны иитиини сайыннарыыга сылгы хаһыытын сатаан тэрийии уонна үчүгэй мэччирэҥ сирэ улахан оруоллаахтарын эппитэ.
“Биһиги үбүлүөйү биирдэ эрэ бэлиэтээбэккэ, сыл устата кэлимсэ тэрээһиннэри ыытыахтаахпыт”, — диэн бэлиэтээтэ улуус баһылыга Николай Старостин.
Социалистическай Үлэ Дьоруойун А.Е.Степанов 100 сылын 2020 сыл устата бэлиэтиэхтэрэ. Үбүлүөй чэрчитинэн чулуу сылгыһыт туһунан кинигэлэри уонна хаартыска альбомун таһаарыахтара, кылаас чаастарын ыытыахтара, Петровка сэлиэнньэтигэр Сылгыһыт күнэ ыытыллыаҕа.
Афанасий Егорович 1920 сыллаахха Мэҥэ Хаҥалас оройуонугар күн сирин көрбүтэ. Эдэр сааһыттан холкуоска үлэлээбитэ. 1941 сыллаахха “Комбайн” холкуос бырабылыанньата А.Е.Степановы сылгыһытынан аныыр, онтон сыл буолан баран, сылгы пиэримэтин сэбиэдиссэйинэн. Сылгыһыт уола да буолан, бу дьыалаҕа олох эрчимнээхтик ылсыбыта. Сылгылары көрүүнү-истиини тупсарар соругу туруорбута. Биэс сыл устата.1945 сылтан 1949 сылга диэри пиэримэҕэ Саха сирин тыйыс усулуобуйатыгар 26 биэттэн 121 убаһаны ылбыттара.
Сылгы иитиитигэр үрдүк төрүөҕү ылан, А.Е.Степановка Ленин уордьанын туттаран туран, Социалистическай Үлэ Дьоруойа үрдүк аат (ССРС Үрдүкү Сэбиэтин Президиумун 1948 сыл атырдьах ыйын 5 күнүнээҕи ыйааҕа) иҥэриллибитэ.Үрдүк таһаарыылаах үлэтин иһин Афанасий Степановы Саха АССР Үрдүкү Сэбиэтин Бочуотунай Грамотатынан бэлиэтээбиттэрэ, 1946 сыллаахха “1940-1945 сс. Аҕа дойду Улуу сэриитигэр килбиэннээх үлэтин иһин” мэтээлинэн наҕараадаламмыта.
А.Е. Степанов 1956 сыллаахха өлбүтэ.
edersaas.ru