Саха сирин кэрэ куота Наталья Оконешникова «FOODSTYLE-2017» бастыҥ фудфотограф аатын ылла. Бу туһунан «Кэрэ куо» портал иһитиннэрдэ.
Атырдьах ыйын 19 күнүгэр Москваҕа аан дойдутааҕы эргиэн киинигэр «FOODSTYLE — 2017»Бүтүн Арассыыйатааҕы үһүс чемпионат ыытылынна. Манна Арассыыйа бастыҥ фудстилистэрэ уонна фудфотографтара иккилии киһинэн сэттэ хамаанданан кытыннылар.
Күрэхтэһии 45 мүнүүтэлээх үс тууртан турда. Хамаандалар бэриллибит тиэмэҕэ араас композициялары оҥордулар. Дьүүллүүр сүбэ техническэй ирдэбилигэр эппиэттиир хаартыскалары түһэрдилэр. Сүрүннээн хамаандалар креативнай уонна уустук композицияларын сыаналаатылар.
Саха сириттэн «Вкусно, быстро и легко» ас-үөл сурунаалын эрэдээктэрэ, киэҥник биллэр фудфотограф Наталья Оконешникова Москва хаартыскаҕа түһэрээччитэ Анастасия Матвеевалыын үс тууру эрэллээхтик ааһан, бастакы миэстэҕэ таҕыстылар уонна чемпионат кубогын ыллылар.
Саха талааннаах кыыһа инникитин да саха аһын-үөлүн киэҥ эйгэҕэ көрдөрө, ситиһиилэнэ турарыгар баҕарабыт.
ЫСПЫРААПКА:
«FOODSTYLE 2017» бырайыак ааптара Ксения Островская киэҥ хабааннаах куонкуруһу үһүс сылын ыытар. «Foodstyle» искусствота Арассыыйаҕа саҥа тарҕанан эрэр. Ол да буоллар, араас дьикти бородуукталары, утахтары, бүлүүдэлэри хаартыскаҕа түһэрэргэ уонна видеоҕа устарга анаан үлэлиир талааннаах дьон элбии турар. Кинилэр өҥөлөрө төһө да ыараханын иһин, хааачыстыбалаах хаартыскаларга, видео-түһэриилэргэ наадыйыы эмиэ элбии турар.
Надежда ЕГОРОВА, «Саха сирэ» хаһыат, edersaas.ru