Солоҕоннор тэрээһиннэрэ — куйаар ситиминэн

Ааптар: 
Бөлөххө киир:

Горнай улууһун Солоҕон нэһилиэгинээҕи Сынньалаҥ киинин үлэһиттэрэ биир дойдулаахтарын интэриниэт куйаарын ситимигэр дьиэҕэ олоруу эрэсиимэ саҕаланаатын кытта үөрэппиттэрэ, хас биирдии киһини кытта дьарыктаммыттара.

edersaas.ru

Ол сыралаах үлэлэрэ таах хаалбата — билигин  култуура эйгэтин үлэһиттэрэ ыытар бары үлэлэригэр бу олус туһалыыр. Ол курдук, биир дойдулаахтарын дьиэҕэ олорор кэмнэригэр Дьокуускай куораттан артыыстары, суруйааччылры, ырыаһыттары кытта сибээстэһэн, тэрээһиннэригэр кытыннарар буолан, солоҕоннор куйаар ситимин нөҥүө ыытыллар тэрээһиннэри олус кэтэһэллэр, сэргииллэр. Бу туһунан Солоҕоннооҕу сынньалаҥ киинин уус-уран салайааччыта  Андрей Сивцев — Лэкээрин Сэргэн Ил санаатын бу курдук үллэстэр:

Сайыҥҥы айылҕаҕа көҥүл көччүйүү, күргүөмнээн мустуу  көҥүллэнэ илик кэмигэр, солоҕоннор куйаар ситимин нөҥүө түмсэн, самаан сайыны уруйдуу көрүстүбүт. 

Ол курдук, биһиги  Дьокуускай куоракка кииннэнэн үлэлиир “Алгыстаах Аартык” Айыы кыһатын кытта ыкса сибээһи олохтообуппут түмүгэр, Солоҕон олохтоохторугар анаан ZOOM сыһыарыынан быһа эпииргэ Алгыстаан Дураһаал уонна кини арыалдьыттара  самаан сайыны уруйдаан, үрдүкү Айыылартан күүс-уох ылар алгыһы түстээтилэр, сырдык, үтүө туомунан баайдылар.


Куйаар нөҥүө алгыс иҥнэ, туом баайылынна, санаа-оноо ыраастанна, хас биирдии ыал сыалаах алаадьыны тиэргэнин ортотугар ууран, Үрдүкү Аар Айыылартан көрдөһөн, быйылгы сыл күөҕэр этэҥҥэ  үктэммитигэр махтанна. Саҕаланна саха Саҥа сыла! 

Бу курдук Солоҕоннооҕу Сынньалаҥ киинэ ыам ыйынааҕы бырааһынньыктары түмүктээтилэр. Аны самаан сайыҥҥы ыһыахтары эмиэ куйаар ситимин нөҥүө тэрийэргэ бэлэм түбүгэр түстүлэр. Култуура үлэһиттэрэ уустук кэмҥэ биир дойдулаахтарын эрдэттэн дьиэҕэ олорор эрэсиимҥэ бэлэмнээбиттэрэ, үлэлэригэр олус туһалаата уонна олус көдьүүстээх буолла.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0