Силиэстийэлиир изоляторга “Аһаҕас аан күнэ” ыытылынна

Ааптар: 
Бөлөххө киир:

Бүгүн, алтынньы 31 күнүгэр, дойду үрдүнэн силиэстийэлиир изолятордар уонна түрмэлэр үлэһиттэрин күнэ бэлиэтэнэр. Ити күнү көрсө, РФ Накаастабылы толорор федеральнай сулууспатын Саха сиринээҕи управлениета алтынньы 26 күнүгэр суруналыыстарга уонна уопсастыба бэрэстэбиитэллэригэр анаан, “Аһаҕас аан күнүн” тэрийдэ.

edersaas.ru

Уопсастыба өттүттэн СӨ Уопсастыбаннай палаататын чилиэнэ, биллиилээх артыыс Андрей И уонна Накаастабылы толорор управление Уопсастыбаннай сэбиэтин бэрэссэдээтэлэ Александр Друзьянов-Алгыстаан Дуруһаал ыҥырыллыбыттар.

Бу, Дьокуускай куорат таһыгар баар 1 №-дээх силиэстийэлиир изоляторга, уорбаланааччылар, буруйданааччылар, сууттанааччылар уонна номнуо сууттаммыт дьон олорор. Манна киирэргэ, хонтуруоллуур-аһардар пууҥҥа (КПП) дьуһуурунай кунуопка баттаан, тимир эрэһээҥкилээх ыарахан ааннары биир-биир арыйан, биирдии киһини киллэрэр.

Маныаха быйыл туруоруллубут программнай-аппаратнай комплекс көмөтүнэн киирбит киһини биометрическай параметрдарын бэрэбиэркэлээн хонтуруоллууллар. Хаартыскаҕа түһэрэр камералаах анал техническэй аппараат киһи мөссүөнүн түһэрэн ылар, ол кэнниттэн дактилоскопическай сканер ону бэлиэтиир. Тарбах суолун кытары.

Ол барыта биир кэлимсэ электроннай базаҕа киирэр. Ол эбэтэр, бу аппараат көмөтүнэн ким киирбитэ-тахсыбыта чуолкай биллэр, хонтуруолланар. Биһиги эмиэ бары ол нөҥүө аастыбыт. Салгыы аны изолятор сотруднига анал тэрилинэн хас биирдии киһини, баҕар, бобуулаах маллары киллэрэн иһэрэ буолуо диэн эргитэ-урбата сылдьан бэрэбиэркэлиир.

Тэрээһин саҕаланыытыгар СИЗО-1 начальнига Вячеслав Жидецкэй  суруналыыстарга анаан оҥорбут брифинигэр изолятор историятыттан билиһиннэрдэ, бүгүҥҥү күҥҥэ быһыы-майгы хайдаҕын, туох соруктар туралларын кэпсээтэ, ыйытыыларга хоруйдаата.

Манна икки куорпус баар — 1974 сыллаахха тутуллубут уонна 2014 сыллаахха үлэҕэ киирбит саҥа дьиэ. Биһигини саҥа куорпуска сырытыннардылар: медицинскэй чааска, ас астыыр блоктарыгар, үөрэнэр сирдэригэр, камераларга, христианнар үҥэр хосторугар, библиотекаҕа, чугас дьоннорун кытта көрсүһэр хосторугар.

Хаһаайыстыбаҕа үлэлиир сууттаммыт эдэр уолу кытта кэпсэтэн ыллыбыт.

Тэрээһин бүтүүтүгэр, РФ Накаастабылы толорор федеральнай сулууспатын Саха сиринээҕи управлениетын начальнига, ис сулууспа полковнига Владислав Дзюба бастакы пресс-конференциятын оҥордо. Суруналыыстар ыйытыыларыгар барытыгар хоп курдук хоруйдаата.

Бүгүҥҥү күҥҥэ силиэстийэлиир изоляторга 479 киһи олорор: ол иһигэр, 30-ча дьахтар, 10 сокуоннай сааһын ситэ илик оҕо, 48 сууттаммыт киһи. 

Биһиги корр., «Саха сирэ» хаһыат, edersaas.ru

Хаартыскалар: Накаастабылы толорор управление пресс-сулууспата уонна ааптар түһэриилэрэ.

+1
0
+1
0
+1
0
+1
0
+1
0
+1
0
+1
0