Бу сыл ыам ыйыгар Дьокуускай куорат дьаһалтата «Парк 20/21» диэн ааттаах арт-эбийиэктэр экологическай куонкурустарын саҕалаабыта. Манна ханнык баҕарар тэрилтэ тимиртэн, пластиктан, өстүөкүлэттэн уонна да атын матырыйааллартан оҥорбут скульптуратынан кыттара ирдэммитэ. Куонкурус сүрүн сыала диэн — туһата суох, быраҕыллыбыт улахан бөхтөн итинник ньыманан босхолонуу, ыраастаныы.
РФ Накаастабылы толорор федеральнай сулууспатын Саха сиринээҕи управлениетын (УФСИН) пресс-сулууспата иһитиннэрбитинэн, бу бэрт интэриэһинэй, сэргэх күөн күрэскэ Дьокуускай куорат 1 №-дээх Силиэстийэлиир изолятора биир бастакынан кыттыбыта.
Бэрт түргэнник көҕүлүүр бөлөх тэриллэ охсон, онно СИЗО хаһаайыстыбаннай хааччыйыытын этэрээтин хаайыылаахтара киирбиттэрэ. Уонна үс нэдиэлэ иһинэн 2,5 м үрдүктээх «Рыцарь» оҥорон-айан таһаарбыттара.
Бу скульптураны оҥорорго арааһы барытын туһаммыттар: массыына саппаас чаастарын, уулусса прожекторын плафонун, душ шлангатын уо.д.а. Аны туран, бу көннөрү тимир оҥоһук буолбакка, өссө тулатын сырдатар аналлаах.
Соторутааҕыта бу куонкурус түмүктэммитин туһунан Саха сиринээҕи Айылҕа харыстабылын кэмитиэтэ иһитиннэрдэ. Накаастабылы толорор управлениены (СИЗО) таһынан, «Горсвет» МУП, «Жилкомссервис» МУП, «Якутдострой» АУо, «Пригородная теплосетевая компания» МУП кыттыбыттар.
Туох да мөккүөрэ суох бастакы миэстэни жюри Силиэстийэлиир изолятор «Рыцарь» скульптуратыгар биэрэргэ быһаарбыт. Иккиһи – «Робот из вторсырья» диэн «Якутдорстрой» үлэһиттэрин скульптуратыгар уонна үсүһү — «Паук» диэн «Пригородная теплосетевая компания» тэрилтэ турбалартан оҥоһугар. Кыайыылаахтар бары харчынан бириэмийэнэн наҕараадаланыахтаахтар.
Бары скульптуралары 15 №-дээх оскуола тэлгэһэтигэр туруоруохтаахтар.
Вера МАКАРОВА, «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.