Быйыл хоту оройуоннарга олус итии күн-дьыл турар. Ити табаны иитиигэ уонна айылҕаҕа кутталы үөскэтэр. Аллайыахаҕа тэриллибит “Кыталык” национальнай пааркатын сиригэр-уотугар киирэр сиргэ итииттэн уот туран, ону умулларыыга үлэ ыытыллар.
Итинэн сибээстээн, Арассыыйа айылҕа ресурсаларыгар уонна экологияҕа министиэристибэтэ уоту хаптатыыга бары күүһүн уурда. Маныаха федеральнай күүстэр уонна умулларыыга мобилизацияламмыт дьон кытталлар. Уот турбут сирэ улуус кииниттэн ыраах. Суол-иис уустук сиригэр уоту хаптатыы үгүс күүһү эрэйэрэ чахчы.
Бэҕэһээ Дьокуускайтан умулларааччылар көтөн тиийбиттэрэ. Кинилэри тута Аллайыаха улууһунааҕы айылҕа харыстабылын иниспиэксийэтэ тэрийэн, 7 мотуордаах оҥочонон умулларыахтаах сирдэригэр чугаһатан илтэ. Сүөкээбит сирдэрэ Чокуурдаахтан 10 км тэйиччи. Өссө ити сиртэн 6-7 км барыахтаахтар.
Уоту умулларааччылары илдьэ ЫБМ үлэһиттэрэ Арсен Трофимов, Андрей Слепцов, улуус дьаһалтатын отделын начаалынньыга Дмитрий Рожин, баҕа өттүнэн көмөлөһөр Ренат Щелканов, “Инди” община баһылыга Алексей Березкин, ыстаарсай госиниспиэктэр Сергей Яныгин, иниспиэктэр Иван Рожин тиэйэн илтилэр. Аны уоту умулларыыга туһаныллар ыарахан малы-салы тиэрдиигэ катерынан вездеходу тиэрдиэхтээхтэр. Онон туундара-тайҕа усулуобуйатыгар үлэлиир уустуктара олус элбэх.
Бу ураты харыстанар паарканы салайыы “Остров Врангеля” диэн Чукоткаҕа Певеккэ баар заповедникка сыһыарыллыбытын быһыытынан бу тэрилтэ дириэктэрэ уонна Саха сирин экология министиэристибэтин ураты харыстанар сирдэрин дириэксийэтин салайааччыта баһаарынньыктары кытта көтөн тиийэн миэстэтигэр умулларар үлэ ыытыллыытын хонтуруоллууллар.
Женни СТРЮКОВА.
Хаартыска: интэриниэттэн