«Саха» национальнай көрдөрөр-иһитиннэрэр хампаанньа продюсерскай киинэ быйылгы сезоҥҥа үс саҥа мелодрама хайысхалаах киинэ сериалын бэлэмнээтэ.
«Маҥнайгы «Биир сайын кистэлэҥэ» сериал бу дьыл сэтинньи ыйыгар хайыы үйэ күөх экраҥҥа тахсыаҕа. Сценариһынан суруналыыс, суруйааччы Сардаана Сивцева — Даана Сард, режиссерунан Елена Эверстова буоллулар. Айымньы көрөөччү киэҥ биһирэбилин ылан, көрдөрөр-иһитиннэрэр хампаанньа салалтата «Биир сайын кистэлэҥэ» сериалы салгыыр туһунан быһаарыы ылыммыта. Киинэ устуута Дьокуускай куоракка, Тулагы-Киллэм нэһилиэгэр уонна Чурапчы улууһун Бахсы сэлиэнньэтигэр ааста», — диэн «Саха» НКИХ продюсерскай киинин салайааччы Марфа Пермякова кэпсээтэ.
Ону таһынан, Сардаана Сивцева-Даана Сард сценарийынан “Иза уонна Лиза” диэн иккис сериал уһуллуоҕа (режиссер Саймон Сергеев). Хартыынаҕа икки эдэр кыыс тулалыыр дьону уонна аймахтарын кытары алтыһыыларын туһунан кэпсэнэр. Марина Платонова режиссердаах өссө биир «Күдээринэ күүрээн» диэн сериалы бэлэмнииллэр. Дьокуускайга уонна Хатаска билигин уста сылдьаллар.
«Сериал киинэтээҕэр ордук норуодунай буолар. Массовкаҕа элбэх киһи кыттар. Сериалга уһуллуон баҕалаахтар элбэхтэр. Күөх экраҥҥа тахсыбытын кэннэ, дьэ, бары аймахтарын кытта үөрэ-көтө көрөллөр», — диир продюсер Алена Антонова.
Телебородууксуйа 16 сиэрийэлээх, 38-тыы мүнүүтэлээх. «Саха» ханаалыгар бу күһүҥҥүттэн тахсыаҕа.
#саха_нких_сонуннара