2000 сыллар саҕаланыыларыгар “Сэргэлээххэ” диэн устудьуоннар олохторун туһунан сериалы, өрөспүүбүлүкэ араас муннугар олорор ыал бары, көтүппэккэ сөбүлээн көрөр этибит. Элбэх киһи сериалга оонньообут оҕолор билигин ханна тиийбиттэрин интэриэһиргиир, толкуйдуур да буолуохтааххыт. edersaas.ru суруналыыстара сериалга уһуллубут артыыстары булан, билигин ханна, хайдах олороллорун сырдатабыт.
Сериал уус-уран салайааччыта Лена Керемясоваттан ыччат бастакы сериала хайдах үөскээбитин, оҕолору хайдах талбыттарын, үп-харчы боппуруоһун туһунан ыйыталастыбыт.
Лена Керемясова:
— 2002 сыллаахха КФЕН-ҥа кастинг оҥорбуппут. Киинэҕэ уһуллуон баҕалаах барыта 200-чэ оҕо кэлбитэ. Онтон сүүмэрдэнэн 20-чэ оҕону ылбыппыт. Эрдэттэн сценарий суох этэ, ол эрэн барыллаан хайдах оруоллар сериалга баар буолуохтаахтара өйгө баара. Дьоруойдары таларга оҕолор баҕалара, сценарий суруйар дьоҕурдара, талааннара барыта оруолу оонньообута. Хас биирдии кастинҥа кытта кэлбит оҕо талааннарын көрдөрбүттэрэ: ким ыллаан, ким үҥкүүлээн, хоһоон ааҕан.
Киинэ идеятын Елизавета Егорованы кытары толкуйдаабыппыт. Сериал нөҥүө эдэр саас, таптал, доҕордоһуу туһунан көрдөрөргө санаммыппыт. Режиссербыт Эльвира Егорова этэ. Сценарийбытын студияҕа бары куолаан суруйар этибит. Үп-харчы боппуруоһугар, сериалбыт биир да солкуобайа суох уһуллубута. Барыта айар энтузиазм баар буолан уһуллубут буоллаҕа. Хас биирдии устуу кэннэ, Эльвира уонна Елизавета оҕолору кытары студияҕа бэйэлэрэ монтажтыыр этилэр.
Чэ эрэ, аны киинэҕэ уһуллубут тыһыынчанан ыччат астынар, таптыыр, “улааттахпына кинилэр курдук буолуом” дии саныыр дьоммут билигин ханна олороллорун, тугунан дьарыктаналларын, тус олохторун туһунан ааҕыаҕыҥ.
Анастасия Старостина-Дранаева – сериалга СГУ саха салаатын устудьуонун, түөрт оҕолоох тыа ыалын, улахан кыыһын Нарыйаны оонньообута. Билигин, Бүлүү куоратыгар олорор, улуус гимназиятыгар библиотека үлэһитэ. Настя кэргэннээх, үс оҕолоох (икки кыыс, биир уол). Сериалга уһуллубут уолаттарыныын инстаграм нөҥүө билсэр. Кыргыттартан Аанчык оруолун оонньообут Настялыын уонна учуутал оруолун толорбут Матвейдыын кэпсэтэр.
Туяра Барчук (Мамаева) – сериалга Алдантан кэлбит сытыы, бааһынай кыыс – Катя оруолун толорбута. Билигин, Хабаровскай куоракка олорор. YakutiaPrime.ru. диэн информационнай-аналитическай портал көрдөрөр-иһитиннэрэр салаатын салайааччыта. Бу сайтка Уһук Илиҥҥи регионнарга буолар туһааннаах тэрээһиннэри уонна билиҥҥи кэмҥэ тоҕоостоох иһитиннэриилэри сырдаталлар эбит. Туяра кэргэннээх, оҕолордоох. Сериалга уһуллубут кэмнэрин олус истиҥник саныыр уонна киинэ серияларын барытын социальнай ситимҥэ страницатыгар илдьэ сылдьар эбит. Оҕолорун кытта, хомойуох иһин, дэҥҥэ кэпсэтэр.
Станислав Федоров – сериалга историческай факультет устудьуонун, киириилээх-тахсыылаах, көрдөөх Афик, ол эбэтэр Афоня оруолун оонньообута. Билигин Хатаска олорор. Чааһынай тэрилтэҕэ үлэлиир, ону таһынан иллэҥ кэмигэр торт оҥоруутунан дьарыктанар. Сакаас киирдэҕинэ тута оҥоробун диир. Стас ыал аҕата, кэргэннээх, икки кыыс уонна биир уол оҕолоох. Сериалга уһуллубут оҕолорун кытта билсэр — Толя, Артем, Витя уонна Владик буолан дьиэ кэргэннэринэн доҕордоһоллор эбит.
Виктор Константинов – сериалга юридическай факультет устудьуонун, кытаанах соҕус майгылаах, боччумнаах, спортсмен уолу – Ньургуну оонньообута. Дьокуускай куоракка олорор. ООО «ЮМАГС» диэн спортивнай уонна оҕо былаһааккаларын оҥорор собуокка үлэлиир. Кэргэннээх, үс оҕолоох (биир уол уонна икки кыыс). Витя төрдүс оҕобутун күүтэ сылдьабыт диэн үөрүүлээх сонунун үллэстэр. Уолаттары кытта дьиэ кэргэнинэн доҕордоһоллор. Дранаева Настялыын инстаграм нөҥүө билсэллэр.
Артем Семенов – сериалга юридическай факультет устудьуонун, өйдөөх, аҕыйах саҥалаах Айсен оруолун оонньообута. Билигин Дьокуускай куоракка олорор. РФ Суутун приставтарын федеральнай сулууспатын Саха сиринээҕи управлениетын үлэһитэ. Артем атырдьах ыйыгар ыал буолаары оҥосто сылдьар. Сериалга уһуллубут уолаттарыныын, бары бииргэ үөрэммиттэр, онон күн бүгүҥҥэ диэри сибээстэрин быспакка доҕордоһоллор.
Анатолий Антонов – сериалга доҕотторо этэллэринэн атаһын туһугар атаҕа тостор, ол эрэн ардыгар тыал хайа дикки үрбүтүнэн сылдьар Толик оруолун оонньообута. Дьокуускайга олорор. Чааһынай тэрилтэҕэ үлэлиир уонна иллэҥ кэмигэр фотографтыыр. Анатолий, эмиэ бу сайын ыал буолаары бэлэмнэнэр.
Владислав Баишев – сериалга үчүгэй майгылаах эрээри, оҕо эрдэҕиттэн олох ыараханын билэн улааппыт буолан, мөкү хаачыстыбата баһыйар Бааска уол оруолун оонньообута. Билигин Дьокуускай куоракка олорор. Чааһынай тэрилтэлээх. Кэргэннээх, үс оҕолоох. Киинэҕэ уһуллубут оҕолорунуун билигин даҕаны доҕордоһор. Барыларын өйүүр, көмө наада буоллаҕына көмөлөһөр.
«Сэргэлээххэ» сериалы биһиги «Вконтакте» баар бөлөхпүтүгэр киирэн көрүҥ https://vk.com/eder_saas , суруттарыҥ.
Сэргэлээххэ оонньообут уолаттар күн бүгүҥҥэ диэри доҕордоһоллор
Анастасия АЛЕКСЕЕВА, «Саха сирэ» хаһыат, edersaas.ru