Семен Березин: “Тустууга бүгүн эрэ кэлбит киһи буолбатахпын”

Ааптар: 
Бөлөххө киир:

Бэҕэһээ Саха Өрөспүүбүлүкэтин спортивнай тустууга федерациятын конференциятыгар бу уопсастыбаннай тэрилтэ президенинэн Ил Түмэн дьокутаата, “Стерх” страховой хампаанньа генеральнай дириэктэрэ Семен Максимович Березин биир санаанан талылынна. Оттон бүгүн саҥа президент суруналыыстарга анаан бастакы пресс-конференциятын тэрийэн ыытта.

Петр ПАВЛОВ, “Саха сирэ”, www.edersaas.ru

-Тустууга бүгүн кэлбит киһи буолбатахпын, 2008 сылтан биир тумус туттар бөҕөспүт Айаал Лазаревы кытта ыкса үлэлэһэбин, 2010 сылтан өрөспүүбүлүкэ тустууга федерациятын бырабылыанньатыгар баарбын, — диир Семен Максимович. – Быйылгы сылга көҥүл тустууга календарнай былаан быһыытынан 30 күрэхтэһиини тэрийэн ыытыахтаахпыт. Бастакы күрэхтэһиилэрбит кулун тутар ыйга ыытыллар Роман Дмитриев кэриэһигэр эдэрдэргэ норуоттар икки ардыларынааҕы турнир, ол кэнниттэн Сунтаарга Николай Тарскай бирииһигэр өрөспүүбүлүкэ чөмпүйэнээтэ. Биир сорукпутунан, улуустарга тустуу федерацияларын үлэлэтии буолар. Ааҕан көрдөххө, билигин уон эрэ улууска федерация баар эбит. Сахаларга спорт бастакы нүөмэрдээх көрүҥүн сайыннарыыга бэйэм кэккэ көрүүлэрдээхпин. Бу күннэргэ спортивнай тустуу федерациятын саҥа талыллыбыт састаабын мунньан үлэбитин быһаарсар былааннаахпыт. Биһигиттэн Үрдүкү спортивнай маастарыстыба оскуолатын дириэктэрэ Александр Игнатьев, Россия эдэрдэргэ сүүмэрдэммит хамаандатын сүрүн тренерэ, Ил Түмэн дьокутаата Петр Юмшанов, норуоттар икки ардыларынааҕы категориялаах судьуйа Семен Чердонов – Россия спортивнай тустууга федерациятын араас салааларыгар быһаччы үлэлэһэ сылдьаллар. Онон киини кытта сибээскэ дьонноохпут. Тустууга сыһыаннаах аптарытыаттаах дьону барыларын тустуу тула түмүөхпүн баҕарабын.

Сэргэх кэпсэтиигэ суруналыыстар Николай Ребров, Владислав Коротов, Иван Ушницкай, Николай Константинов уо.д.а. кыттан, тустуу инники сайдыытын тула бэйэлэрин санааларын үллэһиннилэр.

Пресс-конференцияҕа олорон иһиттэххэ, Семен Березин СӨ спортивнай тустууга федерациятын президенинэн үлэлииргэ улахан баҕалааҕыттан киһи астынар. Биһиги, сахалар бастатан туран, тустуунан аан дойдуга биллиэхтээхпит диэн этиитэ ону бигэргэтэр. Итиэннэ суруналыыстары кытта ыкса сибээстээхтик үлэлээн, баар балаһыанньаны тутатына уонна сиэрдээхтик сырдатарга үлэлэһэр баҕалааҕа, өссө тустуу туһунан интэрниэккэ анал сайт уонна сурунаал таһаарар былааннааҕа биһигини сэргэхситтэ.

Петр ПАВЛОВ, “Саха сирэ”, www.edersaas.ru

+1
0
+1
0
+1
0
+1
0
+1
0
+1
0
+1
0