«Сэбиэскэй Сойууска — Саҥа дьыл» ретро-быыстапка

Бөлөххө киир:

     Саргылаах Саҥа дьыл чугаһаабытын араас уотунан күлүмүрдүү оонньуур киэркэйэ симэммит харыйалар, муустан, хаартан оҥоһуктар кэпсии-ипсии тураллар, санааны көнньүөрдэллэр, үөрүүнү-көтүүнү үксэтэллэр.  Маннык долгутуулаах, кэтэһиилээх бырааһынньыгы көрсө Дьокуускайга А.Е.Кулаковскай  аатынан Норуоттар доҕордоһууларын дьиэтигэр олус үчүгэй быыстапка ыытыллыбытын туһунан биһиэхэ пресс-киинтэн иһитиннэрдилэр.


Норуоттар доҕордоһууларын дьиэтин үөрэтэр-методическай киинэ уонна «Саха сирин коллекционердара»  республикатааҕы уопсастыбаннай тэрилтэ кыттыһан «Сэбиэскэй Сойууска — Саҥа дьыл» диэн ретро-быыстапканы тэрийбиттэр.  Дьоллоох оҕо сааһы санатар лаглайбыт харыйа эҥинэ бэйэлээх үчүгэйкээн оонньуурдарын, оччолорго почтанан долгуйа ыытыһар чаҕылхай кырааскалаах, истиҥ, бэртээхэй ойуулардаах эҕэрдэ аккырыыккаларын А.Е.Кулаковскай аатынан Норуоттар доҕордоһууларын дьиэтин исписэлиистэрэ  Саргылана Адамова, Ольга Аргунова, Татьяна Парникова, Саха сирин Суруналыыстарын сойууһун бэрэссэдээтэлэ Галина  Бочкарева,  коллекционердар Анна Коркина, Капиталина  Алексеева, Татьяна  Еремеева дьоҥҥо-сэргэҕэ көрдөрө аҕалбыттар. Кинилэр өр сылларга муспут коллекцияларын билиһиннэрэллэрин сэргэ, ыйытыыларга хоруйдууллар, сүбэ-ама биэрэллэр, санааларын үллэстэллэр.

Пресс-сулууспаттан манна революция иннинээҕи сэдэх аккырыыккалары, Сэбиэскэй Сойуус саҕанааҕы харыйа оонньуурдарын, симэхтэр араастарын көрүөххүт диэн иһитиннэрэллэр. Быыстапка норуоттар доҕордоһууларын дьиэтин фойетыгар эргэ Саҥа дьылга диэри ыытыллар. Куорат олохтоохторун, ыалдьыттарын оҕо саас умнуллубат кэрэ кэмнэригэр ыалдьыттыыргытыгар ыҥыраллар.

+1
0
+1
0
+1
0
+1
0
+1
0
+1
0
+1
0