Сарсын, олунньу 4 күнүгэр, Дьокуускайга араагы утары охсуһуу Бүтүн аан дойдутааҕы күнүнэн уонна “Доруобуйа харыстабыла” национальнай бырайыак чэрчитинэн “Саха Өрөспүүбүлүкэтигэр онкология ыарыыларын утары охсуһуу” эрэгийиэннээҕи бырайыагы олоххо киллэрэр туһугар анал аахсыйа ыытыллыаҕа.
edersaas.ru
Бу күн баҕалаах дьон сарсыарда 10.00 чаастан күнүс 15.00 чааска диэри “Куруһаала” атыы-эргиэн киинигэр уодаһыннаах ыарыыны сэрэтии, быһаарыы, эмтээһин боппуруостарыгар сүбэни-аманы ылыахтара. Ону сэргэ, экспресс уонна ультразвуковой чинчийиилэри, анаалыстары туттарар уонна маастар-кылааска кыттар кыахтаныахтара.
Ол иһигэр, эмиий араагын сэрэтиигэ хайысхаламмыт “Оруоһабай лиэнтэ” ааксыйаҕа кыттыахтара.
Бэйэҕитин кытары паспоргытын, СНИЛС, полискытын илдьэ кэлэргитин умнумаҥ.
Эбэн эттэххэ:
—Сыл аайы Арассыыйаҕа 65 тыһыынчаттан тахса дьахтар эмиий искэниттэн эмсэҕэлиир;
-Бу уодаһыннаах ыарыыттан сыл аайы 25 тыһыынчаттан тахса дьахтар өлөр;
-Хас күн аайы Арассыыйаҕа 47 оҕо ийэтэ суох хаалар (бу ыарыыттан сылтаан).
-Ыарыы тэтимнээхтик эдэримсийэр: эмиий искэнэ ордук 40-н ааспыт дьахталларга бэлиэтэнэр;
-Ыарыһахтар 30-35 бырыһыаннарыгар ыарыылара хойутаан биллэр. Дьахтар олоҕо уһаан истэҕин аайы, бу ыарыы үөскүүр куттала үрдүүр.
-Хомойуох иһин, эмиий искэнинэн ыалдьыы бастакы миэстэҕэ сылдьар. Кэнники 20 сылга ыарыы элбээһинэ 40 бырыһыаҥҥа тэҥнэстэ.
Надежда ЕГОРОВА, “Саха сирэ”, edersaas.ru