Саргылана Константинова: “Төрүт сокуон уларыйыылара социальнай хайысхалаахтара үөрдэр”
Амма улууһун социальнай көмүскэл управлениетын салайааччыта Саргылана Константинова Арассыыйа Төрүт Сокуона саҥалыы редакцияланан тахсарын сэргиир. Кини киирэр уларыйыылар үксэ социальнай хайысхалаахтарын биһириир.
“Билигин олохпут балысханнык сайдар кэмигэр Төрүт Сокуоммутугар уларыйыылар киирэллэрин биһириибин. Уларыйыы киирэрэ олох ирдэбилэ буолар. Төрүт Сокуон ылыллыаҕыттан элбэх кэм ааста. Онон хайдах да уларыйыы, эбии, көннөрүү киирэрэ наада.
Мин манна ордук болҕойон 75-с ыстатыйатыгар киирбит уларыйыылары билистим. Ол курдук, ыстатыйа 4 пууннаах эбит буоллаҕына, саҥа редакциятыгар эбии 5,6,7 пууннар киирэн биэрбиттэрэ. Манна хамнас алын кээмэйин тиийинэн олоруу кээмэйигэр тиэрдии, биэнсийэни уонна социальнай босуобуйалары, онтон да атын чэпчэтиилэри сыл аайы индексациялааһын этиллэр. Индексациялааһын баар эрээри, мэктиэтэ суох этэ буоллаҕа дии. Билигин бу Төрүт Сокуоҥҥа киирэн, аны мэктиэлээх буолар.
Бэйэм социальнай эйгэҕэ үлэлиирбинэн чэпчэтиинэн туһанааччылар, дьиэ кэргэттэр олохторо тупсарыгар саҥа киирэр уларыйыылары өйүүбүн уонна от ыйын 1 күнүгэр улууспут хас биирдии олохтооҕо кэлэн бэйэтин куолаһын этэригэр ыҥырабын. Ол бары гражданскай иэспит, сокуонунан көрүллэр бырааппыт буолар”, – диэн Саргылана Семеновна санаатын тиэрдэр.
“Амма олоҕо” хаһыат, ulus.media