Сардаана Егинова аатынан анал истипиэндьийэ
Олох-дьаһах

Сардаана Егинова аатынан анал истипиэндьийэ

М.К. Аммосов аатынан Хотугулуу-Илиҥҥи федеральнай университет Ийэ тыл күнүнэн үгэс быһыытынан ыытар  тэрээһинэ  үөрүүлээх быһыыга ааста.

edersaas.ru

ХИФУ ректора Анатолий Николаев эҕэрдэ тылын кэнниттэн, ХИНТуоКҮ дириэктэрэ Гаврил Торотоев Тыл нэдиэлэтин чэрчитинэн университет үрдүнэн ыытыллыбыт күрэхтэр, тылга олимпиадалар кыайыылаахтарын эҕэрдэлээтэ.

1992 сыллаахха университет уһуйааччыта, тыл хаапыдыратын дассыана, б.б.х, тюрколог-учуонай Юрий Васильев-Дьаргыстай Сэмэн Новгородов төрөөбүт күнүгэр Тыл күнүн бэлиэтэххэ диэн этии киллэрбитэ, 1996 сыллаахха СӨ бастакы бэрэсидьиэнэ Михаил Николаев ыйааҕынан бэлиэтэнэр буолбута диэн Гаврил Торотоев университет бу үөрүүлээх күҥҥэ сыһыаннааҕын туһунан кэпсээтэ.

Бу тэрээһин биир бэлиэ түгэнинэн саха тылын бары үөрэхтээхтэрэ,  чинчийээччилэрэ  убаастыыр,  ахтар-саныыр учууталбыт ХИНТуоКҮ саха тылын хаапыдыратын сэбиэдиссэйэ,  дассыан, б.б.х. Сардаана Дмитриевна Егинова аатынан анал истипиэндьийэ туттарыыта буолла. Истипиэндьийэни Сардаана Дмитриевна ийэтэ үлэ бэтэрээнэ Анна Федосеевна Гаврильева, балта Мария Дмитриевна Гаврильева уонна уола Айаал Анатольевич Егинов туттардылар.

Мария Гаврильева, Сардаана Дмитриевна бииргэ төрөөбүт балта:

—Сардаана Дмитриевна Егинова аатынан истипиэндьийэни үһүс сылын туттарабыт. Истипиэндьийэни эдьиийим уола Айаал Егинов үбүлүүр. Быйыл ХИНТуоКҮ үс устудьуонугар 10-нуу тыһыынчаны туттардыбыт. Бу оҕолор – үөрэх туйгуннара, наукаҕа бастакы хардыыларын оҥорон эрэр эдэр чинчийээччилэр. Анал истипиэндьийэ — Сардаана Дмитриевна аатын үйэтитиигэ үлэбит биир көрүҥэ. Ол курдук, ХИНТуоКҮ көҕүлээһининэн сыл аайы семинардары, көрсүһүүлэри тэрийэбит. Истипиэндьийэни туттарар үтүө үгэспитин сыл аайы ыытар былааннаахпыт.

Ньургуйаана Иванова, «Саха сирэ» хаһыат, edersaas.ru

Хаартыскалар Мария Гаврильева  тус архыыбыттан

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

4 + 12 =