Быйылгыттан өрөспүүбүлүкэҕэ быстах кэмнээх бырайыактар салайыы саҥа көрүҥүнэн сүрүннэнэр буолуохтара. Олор, сыл устата боруобалаан, үөрэтэн көрүү кэнниттэн, эһиилгиттэн, 2018 сылтан, сир-сир аайы киллэриллиэхтэрэ. Бу туһунан соторутааҕыта өрөспүүбүлүкэтээҕи бырайыак киин кэмитиэтин мунньаҕар этилиннэ.
Роман Попов, «Саха сирэ» хаһыат, https://edersaas.ru/
Мунньаҕы салайан ыыппыт СӨ Ил Дархана Егор Борисов, өрөспүүбүлүкэни сайыннарыы саҥа стратегията ылынылларынан, сүрүн соруктар чопчу бырайыактар тиһиктэринэн ситиһиллиэхтэрин иһитиннэрдэ. Маныаха уопсастыбаннас көхтөөхтүк кыттара ирдэнэрин бэлиэтээтэ.
Билигин бэлэмнэнии үлэ ыытыллар, уларыйыы нуорма уонна тэрээһин төрүттэрэ ырытыллан оҥоһуллар. Ил Дархан саҥа тэриллибит бырайыагынан салайыы департамеҥҥа үлэһиттэри сүүмэрдээһини түргэтэтэргэ сорудахтаата. Бырайыак киин кэмитиэтин мунньаҕар пилотнай бырайыактар испииһэктэрин дьүүллэстилэр. Кэпсэтии чуолаан экспоры өйүүр киини тэрийии, бизнескэ анаммыт элбэх хайысхалаах киин, спорт национальнай көрүҥнэригэр ХХ “Манчаары Оонньууларын” тэрийэн ыытыы тула барда.
Егор Борисов этии киллэриитинэн, бырайыактар пааспардарын толорууну судургутутарга, болҕомтону чопчу түмүктэргэ уурарга быһаарылынна. Маны тэҥэ анал куурустары барыахтаах үрдүкү сүһүөх салайааччылар испииһэктэрэ оҥоһуллуоҕа.
Мунньах кыттыылаахтара ыйбыттарынан, өрөспүүбүлүкэҕэ бырайыагынан салайыы туһааннаах уопута баар. Ол курдук, “Азия оҕолоро” спорт оонньууларын тэрийии уонна ыытыы кэмигэр маннык салайыы өрүттэрэ туттуллубуттара.
Егор Борисов бэлиэтээбитинэн, салайыы саҥа көрүҥүнэн бүддьүөт үбүн табыгастаахтык туһаныы ситиһиллиэҕэ, ону сэргэ үлэни салайыы биллэ судургутутуллуоҕа.
Роман Попов, «Саха сирэ» хаһыат, https://edersaas.ru/