Сайыны туһалаахтык атаарарга анаммыт былаһаакка

Бөлөххө киир:

Дьокуускайга айар дьоҕурдаах оҕолорго аналлаах АРТ-былаһаакка арылынна.  Үөрүүлээх уонна ураты долгутуулаах тэрээһини «Сырдык сүүрээн» оҕолору ырыаҕа уһуйар устуудьуйаҕа дьарыктанар Айыына Егорова уонна Дайаана Евсеева ыллаан-туойан ситэрэн-хоторон, киэргэтэн биэрдилэр. Бу туһунан биһиэхэ А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрэр. 


Оҕолор сайыҥҥы сынньалаҥнарын туһалаахтык, көдьүүстээхтик атааралларыгар анаан, тэрилтэ базатыгар «Академия творческих каникул» диэн АРТ-былаһаакка тэриллэн үлэтин саҕалаата. Бу оҕолору сайыннарарга көмөлөөх былаһаакканы тэрийэн үлэлэтэргэ А.Е.Кулаковскай аатынан норуоттар доҕордоһууларын дьиэтин художественнай салайааччыта Жанна Николаева көҕүлээтэ. Былаһаакка уус-уран киэргэтиитин уонна дизайнын сүрүн худуоһунньук Эдуард Тойтонов толкуйдаан оҥордо дииллэр.

Академия логотиба — чаҕылхай өҥнөөх, киһини көнньүөрдэр дьэрэкээн кустук. Кустук араас өҥө оҕолор айар дьоҕурдарын күүһүрдэргэ, умсугутарга, интэриэстэрин улаатыннарарга көмөлөөх. АРТ-былаһаакка бырагырааматынан 8-13 саастаах оҕолор ырыаҕа, үҥкүүгэ, саҥарарга-иҥэрэргэ уһуйуллуохтара. Маны сэргэ, фольклорга, сатаан туттарга-хамнанарга үөрэниэхтэрэ, кинилэргэ анаан сэргэх уруоктар, маастар-кылаастар ыытыллаллар. Онтон хас биирдии симиэнэ үлэтинэн — түмүк кэнсиэр көрдөрүллүөхтээх дииллэр пресс-сулууспаттан.

Яна Игнатьева, А.Е.Кулаковскай аатынан норуоттар доҕордоһууларын дьиэтин генеральнай дириэктэрэ:

— Биһиги былаһааккабыт педагогтара хас биирдии оҕо дьоҕуругар таба тайанан, баҕа санаатын билэн, учуоттаан үлэлэһэргэ дьулуһаллар. Былаһааккабыт олус сэргэх, сонун буоларыгар, үөрүүнү-көтүүнү, эрэллээх доҕоттору аҕала турарыгар баҕарабыт, — диэн этэр.

Дьокуускай куорат оскуолаларыттан былаһааккаҕа сылдьыан баҕалаах оҕолор сүргэлэрэ көтөҕүллэн, үөрэн-көтөн мустубуттар. Хас биирдиилэрэ бары сэргиир, сэҥээрэр хайысхаларын талбыттар. Маныаха академия педагогтара оҕолору үөрэтэри, уһуйары сэргэ, бэйэлэрин кистэлэҥнэрин үллэстэллэр, айар эйгэ ураты долгунугар сиэтэн киллэрэллэр диэн пресс-сулууспаттан тоһоҕолоон бэлиэтииллэр. Ол курдук, үҥкүү национальнай театрын туруорааччы-балетмейстера Людмила Антипина, А.Е.Кулаковскай аатынан норуоттар доҕордоһууларын дьиэтин национальнай культураларга киинин сүрүннүүр исписэлииһэ Марина Павлова, «Тойук» фольклорнай-этнографическай ансаамбыл уус-уран салайааччыта Галина Федорова, «Сюрприз» үҥкүү народнай ансаамбылын педагога Андрей Пойда, «Сайсары» вокальнай ансаамбыл уус-уран салайааччыта Светлана Степанова, А.Е.Кулаковскай аатынан норуоттар доҕордоһууларын дьиэтин худуоһунньук-декоратора Галина Илларионова оҕолору дьарыктыыллар.

Арт-былаһаакка үлэтэ:

1 симиэнэ – бэс ыйын 17—30 күннэрэ.

2 симиэнэ – от ыйын 1—14 күннэрэ.

3 симиэнэ – от ыйын 15—28 күннэрэ.

Сэҥээрбиттэр, сэргээбиттэр маннык төлөпүөннэртэн ыйыталаһыаххытын сөп: 8914-104-4627, 8914-232-6060

Хаартыскалар: А.Е.Кулаковскай аатынан норуоттар доҕордоһууларын дьиэтин пресс-сулууспата

 

+1
0
+1
0
+1
0
+1
0
+1
0
+1
0
+1
0