Сайылыктарынан, артыалларынан, сылгы баазаларынан, метеорологтарынан сырыттылар...
Олох-дьаһах

Сайылыктарынан, артыалларынан, сылгы баазаларынан, метеорологтарынан сырыттылар

Ыраах суола-ииһэ суох хотугу улуустарга РФ Төрүт Сокуонугар уларытыылары киллэриигэ куоластааһыны тэрийии олус уустук кэмҥэ баран эрэрин көрө-истэ  сылдьабыт.

edersaas.ru

Өймөкөөн улууһун Төрүт нэһилиэгин куоластааччылара үгүстэрэ ылбычча киһи тиийбэт ыраах сирдэригэр олороллор.

Тымныы полюһун уустук суоллаах-иистээх нэһилиэгэр куоластааһын хаамыытын учаастаактааҕы быыбардыыр хамыыһыйа салайааччыта Светлана Босикова батсаабынан дьонугар-сэргэтигэр сырдата олорор. Онон төрүттэр ыраах олорор биир дойдулаахтарын  олохторун-дьаһахтарын кытта эмиэ билсэллэр. Батсаап сонуннарын көрөн, мин Светлана Иннокентьевнаттан сиһилии кэпсииригэр көрдөстүм.

439 №-дээх куоластыыр учаастакка 4 киһи үлэлиир.  7 учаастакка 293 куоластааччылаахпыт. Төрүккэ бырапыыскалааҕынан 250 киһи олорор курдук да, нэһилиэккэ баара-суоҕа 200-кэ тиийбэт. Төһө да дьоҕус  нэһилиэнньэлээх пуун буоллар,  манна киирсэр сылгыһыттар, сайылыктар, метеорологтар, көмүсчүттэр, суолу оҥорооччулар  тэйиччи сытар учаастактара элбэхтэр. 

 

Кинилэри барыларын кэрийэн быыбардаттыбыт. Суолбут-ииспит олох мөлтөх. Сорох сирдэргэ оҥочолонобут, сороҕор биэрэктэн өр сатыы хаамабыт. Сүрүн көлөбүт — массыына. 

Аны куйааһа диибин диэн, ол быыһыгар ойуур баһаара баар буолан, ыыс-быдаан буруо быыһыгар сылдьабыт. Арыт айаннаан истэхпитинэ, этиҥнээх ардах курулатан ааһар. Иллэрээ күн массыынанан баран иһэн, суолга 2 оҕолоох тыатааҕыны көрбүппүт. Онон бу күннэргэ сэкирэтээрбинээн, Алена Егоровалыын, ууну-уоту ортотунан айанаан үлэлии сылдьабыт.

Буола турар  балаһыанньаны  өйдөөн, коронавирус сыстыганнаах дьаҥыттан дьоммутун харыстаан уонна бэйэбит да харыстанан,  санитарнай  ирдэбиллэри толору тутуһабыт.

Аны ойуур баһаардарыттан сылтаан, онто да суох мөлтөх сибээстээх дьон, уоппут субу-субу баран, сибээстэһэр кыах суох буолан, олус эрэйдэнэбит.

Аҥаардас быыбарынан эрэ муҥурдаммаппыт. Эмп, бородуукта, дьонтон кэһии илдьэбит. Ыраах олорор буолан, барахсаттар бары олус үөрэллэр. Киин сиртэн кэлбит дьону көрсөр курдук көрсөллөр. Бэл, сайылыкка биһигини сонурҕаан, оҕолуун, сылгылыын, ынахтыын утары сүүрэн кэлэллэр.

Аара саҥа арыллыбыт артыалга сылдьан 56 киһини куоластаттыбыт. Онон ырааҕынан-чугаһынан сылдьан, дьоммутун сэргэхситэн кэллибит, — диэн кэпсэтиибитин түмүктүүр учаастактааҕы быыбар хамыыһыйатын бэрэссэдээтэлэ.

Елена ПОТОЦКАЯ «Саха сирэ» хаһыат, edersaas.ru

 

Хаартыска — «Төрүт кэскилэ» батсаап бөлөхтөн.

 

 

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

семь + три =