Күндү доҕоттор, Сайылык күнүнэн!

Ааптар: 
Бөлөххө киир:

Ил Дархан Айсен Николаев 2018 сыл сэтинньи 6 күнүгэр таһаарбыт 150 №-дээх Ыйааҕынан ыам ыйын 22 күнүн Сайылык күнүнэн биллэрбитэ.

Саха сирин бары олохтоохторун саха киһитин кутун-сүрүн хамсатар, сүргэтин көтөҕөр кэминэн, күүтүүлээх самаан сайыммыт эргиллэн кэлиитинэн, Сайылык күнүнэн, итиитик- истиҥник эҕэрдэлиибит!

Сайылыкка көһүү – бу саха норуотун тыйыс айылҕалаах, тоһуттар тымныылаах кыһыны этэҥҥэ туораан, үүт-ас дэлэйэр кэмигэр үктэммитин бэлиэтиир, хас эмит үйэлэри уҥуордаан илдьэ кэлбит үгэһэ, ис дууһатынан сырдаан, үтүөҕэ-кэрэҕэ, саҥа олоххо тардыһар үөрүүтэ буолар. Ону биһиги кэнчээри ыччаттарга тиэрдэр соруктаахпыт.

Сайылык күнэ – өбүгэлэрбит олохтообут үгэстэрин сөргүтүүгэ, омук быһыытынан уратыбытын көрдөрүүгэ, сиэрдээх олоҕу тутуһууга, тыа хаһаайыстыбатын үлэтин сайыннарыыга улахан суолталаах. “Сайыҥҥы биир күн дьылы аһатар” диэн мээнэҕэ этиллибэт. Онон сайыҥҥы ыйдарга Ийэ айылҕабыт күөх быйаҥыттан сомсон, үрүҥ илгэни үрүлүтүөҕүҥ, үрдүк хаачыстыбалаах оту, сиилэһи бэлэмнээһин үлэтин тэрийэн ыытыаҕыҥ. Биһиги сүрүн сорукпут – олохтоох бородууксуйаны оҥоруу тэтимин үрдэтии, бар дьоммутун экологическай өттүнэн ыраас, баай иҥэмтиэлээх аһынан-үөлүнэн хааччыйыы, эдэр дьону тыа сиригэр олохсутуу, тыа хаһаайыстыбатын үлэтигэр сыһыаран үлэлэтии буолар.

Сахабыт сирин бары олохтоохторун Сайылык күнүнэн эҕэрдэлээн туран, бу күнтэн Үрүҥ Илгэ үрүйэлии сүүрдүн, ыраас ыра санааларбыт туругурдуннар, бастыҥ баҕа санааларбыт туоллуннар, тыа киһитин олоҕо – дьаһаҕа тубустун диэн Алгыспытын аныыбыт! Уйгу-быйаҥ олохтоннун!

Истиҥ эҕэрдэни, дириҥ ытыктабылы кытта

“Туймаада” ҮХАПК АУо үлэһиттэрин ааттарыттан

генеральнай дириэктэр Петр Ефремов.

+1
0
+1
0
+1
0
+1
0
+1
0
+1
0
+1
0