Ытык-мааны сахам дьоно, Сайылык күнүнэн!

Ааптар: 
Бөлөххө киир:

Өрөспүүбүлүкэ Аҕа баһылыга Айсен Николаев 2018 сыл сэтинньи 6 күнүгэр саха киһитин кутун-сүрүн хамсатар, сүргэтин көтөҕөр кэмигэр, ыам ыйын 22 күнүгэр – Ньукуолун күнүгэр, Сайылык күнүн  бэлиэтиир туһунан Ыйааҕы таһаарбыта.

edersaas.ru

Сайылык күнүнэн, самаан сайыммыт кэлиитинэн, тыам сирин бары олохтоохторун, “Саха сүөһүтэ” генопуонда хааһына тэрилтэтин уонна Бүтүн Арассыйатааҕы Бааһынай хаһаайыстыбалар итиэннэ кэпэрэтииптэр ассоциацияларын (АККОР) Саха сиринээҕи салаатын бары үлэһиттэрин итиитик-истиҥник эҕэрдэлиибин!

Сайылыкка көһүү – бу биһиги өбүгэлэрбит үтүмэн үйэлэри уҥуордаан кэлбит үтүө үгэстэрэ. Тыйыс айылҕалаах, аам-даам тымныылаах, чэҥ муус үктэллээх кырыа кыһыны туораан, үрүҥ ас дэлэйэр кэмигэр үктэммит саха киһитэ барахсан ис дууһатынан сырдаан, сырдыкка-кэрэҕэ, саҥа олоххо тардыстан, сайылыкка тахсыы сиэрин-туомун тутуһан кэлбит үөрүүлээх үгэстэрин эдэр көлүөнэҕэ тиэрдэр биһиги ытык иэспит.

Ийэ айылҕабыт уһуктар, сайыҥҥы күннэр саҕаланыыларыгар сиргэ-уокка Иэйиэхсит Хотун чугаһаан, кини сылаас тыына Ийэ сиргэ түһэн, салгыҥҥа иҥэн, уйгуну-быйаны түстүүр. Саха киһитин олоҕо сайын кэлиитинэн салҕанар. Сайылык дьоно мустан, ытык маска сүгүрүйэн, лабааларыгар саламаны киэргэтэ баайаллар, ситии ыйыыр туому тутуһан, Ийэ буордарын биэ кымыһынан, суоратынан ыһан айах туталлар. Үрүҥ илгэ дэлэйэрин, сайылыктарыгар, алаастарыгар, сыһыыларыгар адаар муостаахтара, сыппай сиэллээхтэрэ төрөөн- ууһаан төлөһүйэрин, ходуһалара өлгөм үүнүүнү уунарын туһугар Үөһээ Үрдүк Айыыларга үҥэн-сүктэн көрдөһөллөрө.

Сайылык күнэ – төрүттэрбит олохтообут үгэстэрин сөргүтүүгэ, саха омук быһыытынан уратыбытын, духуобунай ис баайбытын көрдөрүүгэ, сиэрдээх олоҕу тутуһууга улахан суолталаах.

Ийэ айылҕабыт кылгас сайынын күөх быйаҥыттан сомсон, көдьүүстээхтик туһанан, Үрүҥ Илгэни, алаастартан, сыһыылартан күөх быйаны сомсон ылыаҕыҥ. Тыа хаһаайыстыбатын бородууксуйатын оҥоруу тэтимин үрдэтии, экологическай өттүнэн ыраас, дьон доруобуйатын бөҕөргөтөр, араас ыарыылартан харыстыыр олохтоох аһынан-үөлүнэн хааччыйыы, эдэр көлүөнэ дьоннору тыа сиригэр чугаһатыы, олохсутуу, тыа сирин үлэтигэр сыһыаран үлэлэтии биһиги сүрүн сорукпут.

Биир дойдулаахтарбын Сайылык күнүнэн эҕэрдэлээн туран, бу күнтэн Үрдүк Үрүҥ Айыылар Орто дойдуга чугаһаан, алгыһы, көрдөһүүнү ылынар кэмнэригэр Илгэ Айылҕабыт күөх уйгу быйаҥыттан күндүлээтин, Үрүҥ Илгэни үрүлүттүн, ыраас ыра санааларбыт туругурдуннар, бастыҥ баҕа санааларбыт туоллуннар, тыа киһитин олоҕо-дьаһаҕа тубустун диэн көрдөстөҕүм буоллун!

Истиҥ баҕа санааны кытта, Александр Артемьев,

“Саха сүөһүтэ” генопуонда хааһына тэрилтэтин салайааччы,

АККОР Саха сиринээҕи салаатын Бэрэсидьиэнэ.

+1
0
+1
0
+1
0
+1
0
+1
0
+1
0
+1
0