Сэтинньи 25 күнүгэр Ньурба улууһугар Марха өрүһү туоруур муоста үөрүүлээх быһыыга-майгыга арылынна.
Муоста тутуллан, Ньурба улууһун иһигэр сылы төгүрүччү айан-сырыы тохтуо суоҕа. “Бүлүү” федеральнай суолун биир улахан эбийиэгэ бүтэн, салгыы хас да, ол иһигэр Үөһээ Бүлүү аннынан Бүлүү өрүһү туоруур улахан муоста тутуллара күүтүллэр. Уопсайа маннык түөрт муоста былааннанар. Кэлэр сылга бырайыактар оҥоһуллуохтара диэн муоста арыллыытын үөрүүлээх мунньаҕар этилиннэ. Үөрүүлээх түгэҥҥэ СӨ Ил Дархана Айсен Николаев сырытта.
Бу күн Дьаархаҥҥа, Ньурбаҕа араас тэрээһинэр ыытылыннылар. Айсен Николаев Антоновка нэһилиэгэр тутулла турар спортивнай саалаҕа сылдьан, үлэ хаамыытын билистэ. Ил Дархан эбийиэк бу сыл бүтүөр диэри үлэҕэ киирэрин ситиһиҥ диэн улуус дьаһалтатыгар сорудахтаата. Салгыы Ньурба улууһун салалтатын пресс-киинин үлэһитэ Геннадий Антонов маннык кэпсээтэ: “Ахсынньы 20-23 күннэригэр бу саалаҕа Өрөспүүбүлүкэтээҕи хапсагай кубогын тэрийэн ыытыахтаахпыт. Онон тутууну түмүктүүр үлэлэр тэтимнээхтик бара тураллар. Уота, ититиитэ киирбитэ ыраатта. Ахсынньы 20 күнүттэн саала үлэтин саҕалыаҕа”.
Муоста тутуллуутун Ньурба улууһун хас да көлүөнэ олохтоохторо күүппүттэрэ. Баҕа санаалара туолан, нэһилиэнньэ үөрбүтэ-көппүтэ сүрдээх. Ньурба улууһуттан төрүттээх, билигин Дьокуускай куоракка олорор педагогическай үлэ бэтэрээнэ Владимир Литвинов Марха муостатын арыллыытыгар анаан суруйбут “Үөрүүбүн үллэстэбин” диэн хоһоонуттан быһа тардыыны таһаарабыт.
Киэҥ Ньурба үрдүнэн,
Саҥа күн арылыйда.
Алмаас таастыы чаҕылыйда,
Саҥа муоста килбиэн иэнин,
Көмүс сардаҥатынан дуйдаата.
Үөрүүнү үллэстэ мустубут,
Дьону-сэргэни
Дьолунан толорон,
Санааны саймаардан,
Кыһыҥҥы кылгас күн
Ылаара сыдьаайда.
Салгыҥҥа ыйаммыт,
Уотунан сандаарбыт,
Саҥа үйэ, сайдыы суола.
Ньургуйаана Иванова, «Саха сирэ» хаһыат, edersaas.ru
Хоһоон, хаартыска Ньурба улууһун дьаһалтатын саайтыттан ылылынна