Бу күннэргэ Андроид уонна Айфон платформаларга “Сахалыы букубаар” бэртээхэй сыһыарыы таҕыста диэн үөрүүлээх сонун кэллэ.
Полиграфиянан дьарыктанар Арсений Колодезников былырыын “Синергия Севера” куонкурус 100 тыһыынча солкуобай суумалаах гранын сүүйэн, бастакы тирэх оҥостон, бэйэтэ эбэн, силигин ситэрэн, бу күннэргэ сыһыарыыны киэҥ эйгэҕэ таһаарда.
“Киһи дойдутуттан ыраах тэлэһийдэҕинэ төрөөбүт дойдутун ордук сыаналыыр эбит дии санаабытым. Атын эрэгийэн, тас дойду дьонун кытта алтыстахха, маҥнай хантан сылдьаргын, кимҥин-туоххун, ол дойду төһө улаханын, национальнай аһылыгы, уо.д.а. олус элбэҕи туоһулаһаллар. Онон төһө кыалларынан дойдум, тылым туһунан киэҥник тарҕатар, дьоҥҥо билиһиннэрэр ирдэнэрин аармыйаҕа ытык иэспин төлүү сылдьан өйдөөбүтүм. Итиэннэ төрөппүттэр бэйэбит дойдубутун, тылбытын билбэт буоллахпытына, оҕолорбутун хайдах иитэбитий диэн санааҕа ылларбытым. Аныгы оҕо төлөпүөн “доҕордоох”. Ол иһин кинилэр эйгэлэригэр чугас, төлөпүөҥҥэ сахалыы сыһыарыы оҥоруохха сөп эбит диэн толкуйга кэлбитим. Дьоҥҥо-сэргэҕэ биһиэхэ маннык сыһыарыылардаахпыт, төлөпүөҥҥүтүгэр хачайдаан көрүҥ диэн илэ көрдөрөргө даҕаны үчүгэй. Оннооҕор Арассыыйа олохтоохторо маннык улахан иэннээх Саха сирэ ханна баарын билбэттэр”, — диэн сыһыарыы ааптара Арсений Колодезников кэпсиир.
Арсений бу иннинэ Google Play Маркекка дьүһүннэр сыһыарыыларын оҥорбут, салгыы сыыппараларга ылсыам дии санаабытым эрээри, бэлиитикэтэ уларыйан итиэннэ күннээҕи түбүккэ баттатан, кэмигэр саҥардан испэккэ сотуллан хаалбыттар эбит. “Синергия Севера” граныгар тирэҕирэн, эрэл кыымын күөдьүтэн, 2013 сылтан толкуйдаабыт сырата күн сирин көрдө.
“Сахалыы букубаар” сыһыарыы үчүгэйэ диэн өҥнөөх, баттаатахха буукуба дорҕооно иһиллэр, ол буукубаттан тахсар биридимиэт, кыыл-сүөл уруһуйа көстөр уонна нууччалыы тылбааһа, англия тылынан транскрипцията суруллар. Уопсайа, 40 буукуба уонна 4 дифтонг киирбит. Ону таһынан кулгаахтарынан истибэт оҕолорго аналлаах азбукалаах. “Оҕоҕо бэйэтигэр туттаран кэбиспэккэ, улахан киһи тэҥҥэ дьарыктанара ирдэнэр. Этиилэр киириэх курдук буоллахтарына, онно уйдаран, салгыыр санаалаахпын. Инникитин сыыппаралары, өҥнөрү, уо.д.а. сыһыарыылары олоххо киллэриэххэ сөп”, — диэн ааптар санаатын үллэстэр.
Андроид уонна Айфон платформаларыгар “Сахалыы букубаар” диэн көрдөөтөххө булан таһаарар. Баара-суоҕа 149 солкуобайга хачайдаан, оҕолоргутугар сахалыы букубаары үөрэтиҥ, төрөөбүт тылыттан тэйитимэҥ!
Людмила ПОПОВА, “Саха сирэ” хаһыат, edersaas.ru