Арассыыйа Бэчээтин күнүгэр, бэчээт үлэһиттэригэр анаммыт дуобукка уһун уонна тыҥааһыннаах күрэхтэһии түмүктэннэ. Кэтэһиллибитин курдук, «Сахабэчээт» автономнай тэрилтэ дуобуксуттара сытыы комбинациялардаах оонньуулары көрдөрөн кыайыы-хотуу үөрүүтүн биллилэр.
Бастакы лигаҕа биэс күүстээх оонньооччу, түөрт маастарга кандидат хара бастааҥҥыттан утарсааччыларын кыайталаан табыллан оонньоотулар. Түмүгэр «Кэскил» хаһыат үлэһитэ Анатолий Павлов—Дабыл ахсыс төгүлүн эрэллээхтик чөмпүйүөннээтэ. Киниэхэ икки очконан сабырыйтаран страховка тэрилтэтин үлэһитэ Андрей Петров үрүҥ көмүс мэтээли ылары ситистэ. Оттон «Чолбон» сурунаал эрэдээктэрэ Иван Осипов—Уйбаан Ойуур Александр Назаров уонна Марина Лыткина курдук дуобакка маастарга кандидаттары кэннигэр үтэйэн, боруонса мэтээл хаһаайына буолла.
Иккис лигаҕа «Сахабэчээт» салайааччылара үчүгэй бэлэмнээхтэрин биллэрэн, сүрүн утарсааччыларын баһыйталаан Филипп Пестряков бастаата, оттон Владимир Сыромятников иккис буолла. Кинилэр оонньуур таһымнара лаппа үрдээбитин көрдөрдүлэр. «Бичик» кинигэ кыһатын кылаабынай эрэдээктэрэ Валерий Луковцев бу сырыыга үһүс миэстэҕэ тигистэ.
— Барыта уон үс оонньооччу кытынна. Онно түөрт дуобакка маастарга кандидаттар бааллара оонньууну сытыырхатта. Күүстээх оонньооччуларга кытта тэҥҥэ эрийсэн Уйбаан Ойуур үһүс буолары ситиспиттэ улахан кыайыы. Кини уксааҥҥа утарсааччыларын өрө көрдөрбөккө кыайталаан, күүстээх уксаанньыт буоларын бигэргэттэ. Оттон иккис лигаҕа Филипп Пестряков уонна Владимир Сыромятников бастакы-иккис буоланнар күннээтилэр. Бу оонньуу сылын аайы ыытыллар буолан, оонньооччулар таһымнара үрдээн иһэр, — диэтэ дуобук күрэхтэһиитин сүрүн судьуйата Иван Андросов.
Иван ОСИПОВ, «Саха сирэ» хаһыат, edersaas.ru
Ааптар түһэриилэрэ.