Саха сирин олохтоохторо аан дойдуга холобур көрдөрдүбүт

Бөлөххө киир:

Саха сирэ нэһилиэнньэтин көҕүлээһинин өйөөн, аан дойдутааҕы куонкуруска бастаата. Бу туһунан бүгүн үп миниистирэ Валерий Жондоров суруналыыстары кытары көрсүһүүтүгэр иһитиннэрдэ.

“Олохтоохтор көҕүлээһиннэрин өйүүр бастыҥ уопут” норуоттар икки ардыларынааҕы куонкурус 2011 сылтан ыытыллар. Быйыл манна 65 дойдуттан сайаапкалар киирбиттэр. Арассыыйа бу куонкуруска быйыл аан бастакытын кытынна. Буолаары буолан, олус ситиһиилээхтик. Куонкуруска Арассыыйаттан Санкт-Петербург уонна Саха сирэ сайаапкаларын, үлэлэрин ыыппыттара. Уопсай түмүккэ Саха сирэ биэс бастыҥ көрдөрүүлээх дойдулар ахсааннарыгар киирэн, анал номинация хаһаайынынан буолла. Куонкурус түмүгүн сэтинньи 27 күнүгэр Барселона куоракка ыытыллыбыт конференцияҕа иһитиннэрдилэр.
Саха сирэ манна туох бырайыагынан кытынна диир буоллахха, кэлиҥҥи сыллартан бэттэх өрөспүүбүлүкэҕэ нэһилиэнньэ көҕүлээһининэн, бэйэлэрэ эбии үбүлээһиҥҥэ кыттыыларынан араас бырайыак олоххо киирэр буолла. Ол курдук, былырыын “Саха Өрөспүүбүлүкэтигэр норуот көҕүлээһининэн социальнай инфраструктураны сайыннарыы туһунан” бырабыыталыстыба 170-с №-дээх уурааҕар олоҕуран, анал бырагыраамаҕа пилотнай бырайыак быһыытынан түөрт улуус, Хаҥалас, Уус Алдан, Үөһээ Бүлүү, Чурапчы, уонна Жатай олохтоохторо бэйэлэрин бырайыактарын көмүскээбиттэрэ. Манна олохтоохтор ким оҕо былаһааккатынан, култуура, спорт эбийиэктэрин өрөмүөннээһининэн, уулуссаны киэргэтиинэн, сырдатыынан, уу ситиминэн, о.д.а. бырайыактарынан кыттыбыттара. Холобур, Чурапчы нэһилиэгэ “Айыллаан” култуура киинин киинэ көрөр саалаҕа, оҕо оонньуур былаһааккатыгар уларытан биэрбитэ. Кэптэнилэр сынньалаҥ кииннэрин өрөмүөннээбиттэрэ. Болтоҥолор киирии ааркаларын саҥардыбыттара. Хачыкааттар кулууптарын таһын өрөмүөннээбиттэрэ.


Бырагыраама чэрчитинэн, хас биирдии кыайбыт бырайыакка өрөспүүбүлүкэ бүддьүөтүттэн 1-1,5 мөлүйүөн солкуобай көрүллүөхтээҕэ. Муниципальнай тэриллии бырайыак үбүлээһинин 5 %, нэһилиэнньэ 3 % уйунуохтааҕа. Валерий Жондоров бэлиэтииринэн, былырыын бу бырагыраамаҕа барыта 208 этии киирбититтэн, 56 сайаапка талыллыбыт. Олортон 32-тэ куонкуруһу ааһан, бүддьүөттэн 31,9 мөл. солк. ылбыт. Бырагыраамаҕа барыта 53,1 мөл. солк. барбыт. Ол иһигэр муниципальнай тэриллиилэртэн – 9,1, бүддьүөттэн атиын источниктартан – 5,8 уонна нэһилиэнньэттэн – 6,2 мөл.солк. хомуллубут.
Быйыл норуот көҕүлээһинин бырагырааматыгар 376 нэһилиэнньэлээх пуун кыттыбыт. Кинилэртэн барыта 1545 этии киирбит. Балартан куонкуруска 502 этии ылыллыбыт. Уопсай түмүккэ 451 бырайыак куонкуруһу ааһан, үбүлээһини ылбыт. Санатан эттэххэ, бүддьүөттэн быйыл бу бырагыраамаҕа 500 мөл. солк. көрүллүбүтэ.

Аграфена КУЗЬМИНА, “Саха сирэ” хаһыат, Мария ВАСИЛЬЕВА хаартыскаҕа түһэриилэрэ (СИА).

+1
0
+1
0
+1
0
+1
0
+1
0
+1
0
+1
0