Бүгүн, от ыйын 5 күнүгэр «Амма-Олимп» стадиоҥҥа Саха сирин норуоттарын спортивнай оонньууларын көҥүл тустууга күрэхтэһиитэ саҕаланна. Көбүөргэ уолаттар уонна улахан дьон туспа бөлөхтөрүнэн кытталлар. Ыйааһын ахсын, сүүмэрдээһин быһыытынан 16-лыы бөҕөс тустар.
Кылгастык эр дьон бөлөҕөр бүгүн ыытыллар биэс ыйааһын кыттааччыларын билиһиннэрдэххэ, 57 киилэҕэ Амматтан маастар Роберт Окороковы, эдэрдэр Михаил Васильевым (Горнай) уонна Айаал Белолюбскайы (Дьокуускай) чорботуохха сөп.
61 киилэҕэ тэҥ күүстээх састаап мустубут. Ол курдук, Амматтан Георгий Окороков, Үөһээ Бүлүүттэн Ньургун Александров, Устудьуоннар сойуустарыттан Быйаман Яковлев, Уус Алдантан Виталий Эспек, Амматтан Европа чемпионатын призера Владимир Егоров курдук күүстээхтэр бааллар. Онон бу ыйааһыҥҥа хатыһыылаах хапсыһыылары күүтэбит.
Салгыы 70 кг ыйааһыҥҥа Арассыыйа чөмпүйүөнэ буола сылдьыбыт Егор Пономарев (Чурапчы), Арассыыйа призера Вячеслав Ефремов (Горнай) уонна уопуттаах маастар Игнат Андросов (Таатта) эдэрдэри тургутан көрүөхтэрэ. Өссө бу ыйааһыҥҥа Дьааҥыттан Василий Стручков баар.
74 киилэҕэ хабыр хапсыһыылар буолуохтара. Манна дойду чөмпүйүөннэрэ Александр Контоев (Горнай) уонна Прокопий Петров (Дьокуускай) кытталлара, дьон болҕомтотун тардар. Кинилэри тэҥэ Виктор Степанов, Ларион Андреев, Ньургустан Брощев уонна Иван Барашков курдук күүстээх бөҕөстөр бааллар.
86 киилэҕэ мэтээл иһин сүрүннээн Дмитрий Шадрин (Орто Халыма), Софрон Софронов (Мэҥэ Хаҥалас), Алексей Ефимов (Амма), Игорь Софронеев (Нам) киирсиэхтэрэ дии саныыбын.
Итиэннэ 97 киилэҕэ үөһэ бөлөххө Василий Ефимов (Амма), оттон аллараа Максим Толмачев (Дьокуускай) уонна Кузьма Сивцев (Нам) тустуулара сэҥээриини тардыаҕа.
Бу ыйааһыннарга чөмпүйүөннэр уонна призердар ааттарын сарсын билиэхпит.
Петр Павлов.