«Саха сирин киэн туттуута» бириэмийэ кыайыылааҕа — Бүлүү маастара Николай Степанов
«Саха сирин киэн туттуута» бириэмийэ «Норуот маастара» номинациятыгар финалистары талыы куоластааһынын түмүгүнэн инники күөҥҥэ Бүлүүттэн норуот маастара Николай СТЕПАНОВ таҕыста.
Николай Степановка 2741 киһи куолаһын биэрдэ.
Атын финалистарга хайдах куоластаатылар? Лидия Тимирдяева(Таатта улууһа) — 2483 куолас, Василена Шарина (Амма улууһа) — 2284 куолас, Мария Захарова (Мииринэй оройуона) — 1634 куолас уонна Татьяна Карамзина (Нам улууһа) — 1580 куолас.
Николай Степанов — тимир ууһа. Кини хомуһу, саха быһаҕын, бетонтан уонна муустан скульптуралары оҥорор. Бүтүн Арассыыйатааҕы, өрөспүүбүлүкэтээҕи, улуустааҕы таһымнаах араас куонкурустар кыайыылаахтара. Норуот маастара Кытайга оҥоһуллубут «Доҕордоһуу сэргэтэ» диэн үлэ ааптара. Бу үлэтин иһин Николай Степанов «Арассыыйа уонна Кытай икки ардыларыгар доҕордуу сибээһи бөҕөргөтүү иһин» Кытай Народнай Өрөспүүбүлүкэтин боуоттаах бэлиэтинэн наҕараадаламмыта.
«Саха сирин киэн туттуута» бириэмийэ «Норуот маастара» номинациятыгар Николай Стеапнов кыттарыгар анаан сайаапканы оҕолоро суруйбуттар.
— Интернеттээҕэр буолуох, сибээс да мөлтөх буолан, үгүс билэр дьонум сүүмэрдээһин кэмигэр куоластаабакка хаалан, бэйэбэр эрийэ сылдьыбыттара. Сибээс суоҕун хайыамый? Куоластааһыны «Сахамедиа» ыытар буоллаҕа. Хата, киин куоракка, атын улуустарга олорор норуот маастардара, табаарыстарым, миигин истэн билэр дьон куоластарын биэрэн, куонкуруска кыттар чиэскэ тиксибитим. Бу суолталаах номинацияҕа аны бастаан, кыайыылаах бочуоттаах аатын ылар чиэскэ тиксибиппиттэн олус үөрдүм. Түгэнинэн туһанан, миэхэ куоластарын биэрэн өйөөбүт дьоҥҥо барҕа махталбын тиэрдэбин, — диэн санаатын үллэстэр Николай Степанов.
Норуот маастара инники былаана үгүс. Сотору кэминэн Москваҕа тиийэн, быыстапкаҕа саха хомуһун билиһиннэрэр соруктаах.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр таба тайаммыт үлэттэн дьоллонор дьону кэмигэр бэлиэтээн көрүү буолар. Кинилэргэ махтал тылларын саамай күөгэйэр күннэригэр сырыттахтарына этэн үөрдүү.
«Саха сирин киэн туттуута» норуот бириэмийэтин генеральнай спонсора — «Көмүлүөк» саха иһитин оҥорор фирма.
Елена ПОТОЦКАЯ, «Саха сирэ» хаһыат, edersaas.ru