“Саха сирин киэн туттуута” норуот бириэмийэтигэр “Баҕа өттүнэн көмөлөһөр эколог” номинацияҕа саамай элбэх куолаһы ылбыт биэс киһи аата билиннэ. Кинилэр тустарыгар түмүктүүр куоластааһын олунньу 4 күнүттэн саҕаланар.
Баҕа өттүнэн көмөлөһөр эколог аатын ылар иһин сүүмэрдиир куоластааһын тохсунньу 28 күнүгэр саҕаламмыта уонна бүгүн, олунньу 1 күнүгэр түмүктэннэ. Бу үгэс курдук GOLOS.YSIA.RU ыытылынна. Номинаннарга 22528 куолас киирдэ. Түһүмэх түмүгүн “Сахамедиа” тэхиньиичэскэй сулууспата сиһилии бэрэбиэркэлээтэ. Тэрийээччилэр бары кыттааччылар чиэһинэйдик киирсибиттэрин иһин махтаналлар.
Ыытыллыбыт бэрэбиэркэ түмүгүнэн финалга биэс киһи киирдэ:
— Мохначевскай Иван, “Кыайыы ойуура: уопсастыбаннай миэстэлэргэ маһы олордуу” патриотическай экологическай бырайыак ааптара , Амма улууһун Амма с. , 90 саастаах, 2921 куолаһы ылла.
— Горохова Галина, кыраайы үөрэтэр мусуой салайааччыта, “Казачьетааҕы орто оскуола” үөрэх тэрилтэтин “Эдэр казачьелар” экология волонтердарын хос бэрэссэдээтэлэ, 66 саастаах. Усуйаана улууһа, 2664 куолаһы ылла (1332*2) (кини куолаһын ааҕыыга тэҥниир коэффициеннэр туһаныллыбыттара).
— Васильев Антон, романтик – бэйэтин дьулуурунан үлэлээччи, бөҕү-сыыһы хомуйуунан 2011 сылтан дьарыктанар, 34 саастаах. Кини 2654 куолаһы ылла.
— Захарова Сардаана, Үөһээ Бүлүүтээҕи М.А.Алексеев аат. өрөспүүбүлүкэтээҕи лицей-интэринээт “Тоҥуочаан” экологическай-туристическай лааҕырын салайааччыта, 49 саастаах, 2148 куолаһы ылла.
— Аргунова Октислава, “Айылҕа харыстабыла” Бүтүн Арассыыйатааҕы уопсастыба чилиэнэ. “Арассыыйа ийэлэрэ” Бүтүн Арассыыйатааҕы хамсааһын чилиэнэ, 48 саастаах, 1903 куолаһы ылла.
Куоластааһын бастакы түһүмэҕин кыайыылаахтарын эҕэрдэлиибит. Бүлүү улууһуттан Тихонова Анастасияны (1840 куолас) уонна Сунтаар улууһуттан Надежда Данилованы (1536 куолас) бэлиэтиибит. Олунньу 4 күнүгэр түмүк куоластааһын ыытыллыаҕа. Кыайыылаах аатын олунньу 8 күнүгэр этиэхпит.
edersaas.ru