Саха сирин Ил Дархана норуодунай суруйааччы Николай Лугиновтуун көрүстэ
Саха сирин Ил Дархана бүгүн Саха норуодунай суруйааччыта, СӨ Духуобунас академиятын вице-бэрэсидьиэнэ, Арассыыйа Суруйааччыларын сойууһун бырабылыанньатын хос бэрэссэдээтэлэ Николай Лугиновтуун көрүстэ
Өрүттэр өрөспүүбүлүкэ култуураҕа уонна духуобунаска, төрөөбүт тылга уонна литератураҕа сыһыаннаах боппуруостарын таарыйдылар.
Николай Лугинов өрөспүүбүлүкэ баһылыгар култуура уонна духуобунас сайдыытыгар киллэрэр кылаатын иһин махтанна. Норуодунай суруйааччы ону тэҥэ Духуобунас академията ыытар үлэтин билиһиннэрдэ.
Улуу Кыайыы 75 сылын чэрчитинэн 1941-1945 сыллардааҕы Аҕа дойду Улуу сэриитигэр Саха сирин хорсун уонна кыргыһыы толоонугар хаалбыт саллааттарын туһунан кинигэлэри бэчээттээн таһаарыыга анаммыт литература бырайыагын туһунан этии киллэрдэ.
“Бу бырайыак Улуу сэрии сылларыгар фроҥҥа ыҥырыллыбыт биир дойдулаахтарбыт сырдык ааттарын үйэтитиигэ туһуланыаҕа уонна биһиги кинилэргэ ытыктабылбытын көрдөрүөҕэ. Бырайыака Саха сирин эрэ буолбакка, Арассыыйа суруйааччылара эмиэ кыттыахтара”, — диэн бэлиэтээтэ Николай Лугинов.
Кини маны сэргэ айар интеллигенция Ил Дархан биллэрбит Ийэ дойдуга бэриниилээх буолуу сылыгар көхтөөхтүк кыттыахтара диэн эрэннэрдэ. Кинилэр маныаха ыччат тэрилтэлэрин, оскуола оҕолорун көрдүүр бөлөхтөрүн кытыннаран, архыып матырыйаалларын хомуйуохтара, бу кинигэ таһаарыытыгар эрэ буолбакка, биллибэт дьоруойдары үйэтитиигэ көмөлөһүөҕэ.
“Литература уонна сурукка тиһиллибит хроника нөҥүө биһиги норуоппут Аҕа дойду Улуу сэриитигэр кыайыытын ыччакка тиэрдэр кыахтаахпыт”, — диэтэ кини.
Айсен Николаев Саха сирин норуодунай суруйааччытын көҕүлээһинин өйөөтө уонна олоххо киирэригэр эрэнэрин биллэрдэ.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.