Саха сирин арҕааҥҥы муниципальнай оройуоннара Инвестиционнай форумҥа бырайыактарын көрдөрүөхтэрэ
Мииринэй оройуонугар бэс ыйын 13-14 күннэригэр “Саха сирин арҕаа өттө – саҥа кыахтар” Инвестиционнай форум ыытыллыаҕа. Форум инвестордары тардар уонна арҕааҥҥы оройуоннары социальнай-экэнэмиичэскэй өттүнэн сайыннарар туһугар тэриллэр.
Бырабыыталыстыба бэрэссэдээтэлин бастакы солбуйааччы Алексей Стручков бэс ыйын 4 күнүгэр Инвестиционнай форуму тэрийиигэ анаммыт арҕаа сытар 9 оройуон баһылыктара кыттыылаах видеокэмпириэнсийэни тэрийдэ.
Инвестиционнай форум кэмигэр панельнай дискуссиялар, төгүрүк остуоллар, дьыалабыай оонньуулар уонна секциялар буолуохтара. Итилэргэ тырааныспар, хайаттан хостуур, ньиэп-гаас, агробырамыысыланнай, туристскай, алмааһы кырыылыыр, тутуу эйгэлэригэр инвестбырайыактары олоххо киллэрии ньымаларын дьүүллэһиэхтэрэ.
Бүгүҥҥү туругунан, Саха сирин арҕаа өттүгэр ыытыллар Инвестиционнай форумҥа Уһук Илини сайыннарыыга уонна РФ Арктикаҕа, Тырааныспарка, Киһи хапытаалын сайыннарыыга министиэристибэлэрэ уонна сайдыы атын институттара кыттарга бэлэмнэрин биллэрдилэр.
Дьыалабыай секциялар түмүктэринэн инвестициялары тардыы уонна Саха сирин арҕааҥҥы өттүгэр инвестбырайыактары олоххо киллэрии эйгэлэригэр бииргэ үлэлээһиҥҥэ 15–тэн итэҕэһэ суох сөбүлэһии түһэрсиллиэҕэ. Моно-хайысхалаах куораттар сайдыыларыгар эмиэ болҕомто ууруллуоҕа.
Сүбэ мунньах кэмигэр муниципальнай тэриллиилэр баһылыктара форумҥа кыттар баҕалаахтарын иһитиннэрдилэр. Хас биирдии муниципальнай оройуон ханнык инвестиционнай бырайыагы таларын чопчулаабыт.
Саха сирин бастакы вице-премьерэ Алексей Стручков өрөспүүбүлүкэ уонна муниципальнай былаастар бииргэ түмсүүлэринэн форум үрдүк тэрээһиннээхтик барыа диэн эрэнэрин биллэрдэ. “Бу форум эһиги муниципальнай тэриллиилэргит сайдыыларыгар туһуланар. Форумҥа федеральнай уонна өрөспүүбүлүкэ былаастарын бэрэстэбиитэллэрэ кыттыахтара, кинилэр инвестордары хайдах буларга үөрэтиэхтэрэ. Форум бу тутаах сыалын толорууга бары кыттыаххыт диэн эрэнэбин. Форум түмүгэр Саха сирин арҕааҥҥы оройуоннарын сайдыыларыгар саҥа саҕахтар арыллыахтара”, — диэтэ Алексей Стручков.
Саха Өрөспүүбүлүкэтин Ил Дарханын уонна
Саха Өрөспүүбүлүкэтин Бырабыыталыстыбатын пресс-сулууспата.