Саха сиригэр өссө 4 киһи коронавируска сутуллан, ыарыһах ахсаана 14 тиийдэ
Бүгүн. кулун тутар 26 күнүгэр. Ил Дархан Айсен Николаев сарсыардааҥҥы брифиҥҥэ дойду Аҕа баһылыга Владимир Путин Арассыыйа олохтоохторугар туһаайан эппит этиитигэр улахан суолта уурулларын бэлиэтээтэ. Өрөспүүбүлүкэ салалтата бу уустук кэмҥэ дьоҕус урбааны өйүүргэ, кинилэргэ чэпчэтиини олохтуурга үлэлэһэрин эттэ.
—«Вектор» лабораторияҕа ыытыллыбыт 4 киһи анаалыһа чуолкайданна, онон өрөспүүбүлүкэҕэ 14 киһи коронавируһунан ыалдьыбыта билиннэ. Роспотребнадзор хайысхатынан оҥоһуллубут 300 киһи анаалыһа ыарыыга сутуллубатахтарын көрдөрөн, ыарыы түргэнник уонна киэҥник тарҕамматаҕар эрэли үөскэттэ.
Ол эрэн, Доруобуйа харыстабылын үлэһиттэрэ балыыһаҕа куойка ахсаанын ыйыллыбыт нормативтан элбэтэн биэрдилэр. Бэҕэһээ ону тиийэн көрдүм. Коронавируска уорбаланан киирбит дьону көрсөргө, эмтииргэ үрүҥ халааттаах аанньаллар бэлэмнэр», — диэтэ Айсен Николаев.
Хаартыска: yakutia-info
Марианна Тыртыкова, «Саха сирэ» хаһыат,, edersaas.ru