Бүгүн, ыам ыйын 14 күнүгэр, 11:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
Ил Дархан Айсен Николаев:
— Саха сиригэр өссө 35 киһи ыарыйда. Ол иһигэр Дьокуускайга 33 киһи ыарыыга сутулунна. Бу дьон үксэ бииргэ үлэлиир дьонуттан уонна дьиэлээхтэриттэн сыстыбыт. Оттон Намҥа уонна Алдаҥҥа биирдии киһи ыарыйда, бу ыалдьыбыт дьону кытта хантаактаспыттар сутулуннулар. Бүтэһик сууккаҕа 28 киһи үтүөрдэ.
Бэҕэһээ ыарахан туруктаах уон ыарыһах баара, билигин сэттэ буолла.
Бэйэни хааччахтаан олоруу эрэсиимин тутуһуохтаах дьон — атын эрэгийиэнтэн кэлбит дьон 25 %-на эрэсиими тутуспат эбит. Бу хомолтолоох түмүктээх буолуон сөп. Дьокуускай олохтоохторо өрүс устарын көрө тахсаллар, бу мантан туттунуохха. Өрүс сыл аайы устар, быйыл көрбөтөххө туох буолуо суоҕа. Элбэх дьон түмүстэҕинэ ыарыы маассабай тарҕаныыта буолуон сөп.
Дьокуускайга хааччахтыыр миэрэлэри устар туһуттан күҥҥэ уонтан аҕыйах киһи ыалдьара бэлиэтэниэхтээх.
Инньэ гынан, Саха сиригэр ыам ыйын 14 күнүгэр маннык балаһыанньа:
687 киһи дьаҥ саҕаланыаҕыттан ыарыйда;
175 киһи үтүөрдэ;
4 киһи тыына быһынна.
edersaas.ru