Бу күннэргэ Арассыыйа наукатын уонна үрдүк үөрэҕин миниистирин бастакы солбуйааччы Григорий Трубников Саха сиригэр кэлэ сылдьар. Ил Дархан Айсен Николаев уонна ХИФУ үлэһиттэрэ кыттыылаах кэтээн көрөр сэбиэт мунньаҕар университет сайдар бырагырааматын отчуотун иһиттилэр.
Ил Дархан Айсен Николаев суруналыыстары кытта санаатын үллэстэригэр: “ХИФУ, өрөспүүбүлүкэ стратегическай суолталаах тэрилтэтэ буолар. Биһиги чугастааҕы сылларга сүрүн сорукпут – Дьокуускайга аан дойду таһымнаах наука үөрэтэр киинин тэрийии. Бырайыак сыҕарыйан эрэр. Эрэгийиэннээҕи Киини тэрийии туһунан ыйаахха илии баттаабытым. Бырайыагы Камчатка, Магадан уонна Чукотка салайааччылара өйүүллэрин итиэннэ манна кыттар санаалаахтарын биллэрдилэр. Билигин Уһук Илин уокурук уонна өрөспүүбүлүкэ сиригэр-уотугар үлэлиир бөдөҥ хампаанньалары кытта кэпсэтэ сылдьабыт”, — диэн билиһиннэрдэ. Итиэннэ бары 15 хайысхаҕа барытыгар инники күөҥҥэ тахсар кыаллыбатын, бэйэ кыаҕын билинэр ирдэнэрин, онон икки-үс сүрүн салааҕа күүскэ ылсан, аан дойду таһымыгар сайдар наадатын эттэ.
Дойду Наукаҕа уонна үрдүк үөрэххэ миниистирин бастакы солбуйааччы Григорий Трубников Ил Дархан Уһук Илин эрэгийиэннэрин кыахтарын түмэр санаалааҕын өйүүрүн биллэрдэ уонна бу улахан суолталааҕын ыйда. “Мин санаабар, университекка күрэстэһэр кыахтаах кэккэ компетенциялар бааллар. Саха сирэ уонна аттынааҕы эрэгийиэннэр аан дойдуга инники сылдьар хайысхаларга – килиимэт уларыйыытын, киһи-аймах Арктикаҕа, хотугу уустук килиимэттээх сиргэ олохсуйуутун, социальнай боппуруоска тиийэ чинчийиилэр буолуохтаахтар. Ону тэҥэ, кэлин истибиппинэн, экэниэмикэҕэ оруоллаах ньиэп, гаас салаатыгар болҕомто эрэйиллэр”, — диэн санаатын иһитиннэрдэ.
Григорий Трубников бу күн университет кэккэ бакылтыаттарын көрдө-иһиттэ, туох үлэ барарын билистэ. “Математика уонна информационнай технология хаапыдыратын соһуйа көрдүм. Уопсайынан эттэххэ, Саха сирэ “виртуальнай реальность”, көмпүүтэр оонньуутун эйгэтигэр индустриальнай хампаанньалар дойду илин өттүнээҕи болҕомтону тардар кииннэринэн буолар. Бу олус үчүгэй бэлиэ, көрдөрүү”, — диэн иһитиннэрдэ.
СӨ үөрэҕин уонна наукатын миниистирэ Владимир Егоров наука үөрэтэр киинэ тэриллиитэ Арктиканы сайыннарыыга дойду сүрүн соруктарын толороругар эрэнэрин биллэрдэ. “Ирбэт тоҥҥо, килиимэккэ, технологияҕа уонна ньиэп, гаас эйгэтин салаатын компетенциялара үтүө түмүгү биэрэн, олоххо туһаныллыахтара”, — диэн эттэ.
Людмила ПОПОВА, “Саха сирэ” хаһыат, edersaas.ru