Бүгүн, от ыйын 14 күнүгэр, 11:00 чааска СӨ Доруобуйа харыстабылын миниистирэ Елена Борисова уонна Үлэ, социальнай сайдыы миниистирэ Елена Волкова эрэгийиэҥҥэ коронавирус балаһыанньатын туһунан брифинг ыыттылар.
Үлэ, социальнай сайдыы миниистирэ Елена Волкова:
— Коронавирус дьаҥа тарҕамматын туһуттан үс ый кэриҥэ социальнай тэрилтэлэр хааччахтааһын эрэсиимигэр үлэлииллэр. Ол аата үлэһиттэр суукканы быһа эппиэкэҕэ сылдьааччыларын көрөллөр-истэллэр, 14 күҥҥэ симиэнэнэн үлэлииллэр. Оттон интэринээт-дьиэлэргэ уонна психоневрологическай ыарыылаахтар интэринээттэригэр симиэнэ 28-тыы күнүнэн солбуһар. Маннык быһаарыныылары Саха сирэ атын эрэгийиэннэртэн биир бастакынан ылыммыта. Бу курдук үлэ балаҕан ыйыгар диэри ыытыллара буолуо диэн сабаҕалыыбыт.
Билигин өрөспүүбүлүкэ үрдүнэн сабыылаах эрэсиимҥэ 47 тэрилтэ үлэлии турар. Дьаҥ тарҕамматын туһуттан миэрэлэр барыта тутуһуллаллар.
Томмоттооҕу психоневрологическай интэринээккэ бэрэбиэркэ ыытылла турар. Коронавирус дьаҥа хантан киирбитин быһаараллар. Манна элбэх саастаах инбэлиит олорор. Тастан салайыыны киллэрдибит, үлэлиир персоналы элбэтиэхпит, туох баар санитарнай миэрэ барыта тутуһуллар.
edersaas.ru