Бүгүн, ыам ыйын 30 күнүгэр Ил Дархан Айсен Николаев брифинг кэмигэр ааспыт сууккаҕа саамай элбэх киһи ыарыйда диэн эттэ. Ол курдук, суукка устата өрөспүүбүлүкэҕэ 114 киһи ыалдьыбыта бэлиэтэммит.
Эпидемия саҕаланыаҕыттан 1814 киһи ыарыйда диэтэ. Ааспыт сууккаҕа 114 киһи ыалдьыбытыттан 84 киһи — Дьокуускай куоракка, 18 киһи – Ленскэй оройуонугар. “Ленскэй оройуонугар бу, ыарыы күөдьүйүүтэ буолбатах, Талаканнааҕы гаас-ньиэп хостонор сириттэн ыалдьыбыт дьону баартыйанан аҕалыылара буолар. Талакааннааҕы сир баайдаах миэстэтиттэн салгыы ыалдьыбыт дьон ахсаана аҕыйыырыгар эрэнэбит. Сургутнефтегаз салалтатын, СӨ Доруобуйа харыстабылын министиэристибэтин уонна өрөспүүбүлүкэ суһал штабын кытта сүбэлэһэн, ирдэнэр миэрэлэри барытын ыллыбыт”, — диэн Ил Дархан эттэ.
Дьокуускай куоракка үгүстэрэ дьиэ кэргэнинэн, “коропоративынан” ыалдьалларын эттэ. Биирдиилээн ыалдьыы суоҕун ыйда. Бу күннэргэ – субуотаҕа, өрөбүлгэ куорат олохтоохторо олоччу дьиэҕэ олорон, кэлэр нэдиэлэттэн балаһыанньа тупсарыгар эрэнэрин биллэрдэ.
Өрөспүүбүлүкэ үрдүнэн 15 ыарыһах ыарахан туруктаахтарын ыйда, итинтэн 11 киһи – Дьокуускайга, 4 киһи – Миринэйгэ. Үтүөрбүт киһи ахсаана эмиэ эбиллэн иһэрин иһитиннэрдэ, суукка устата 42 ыарыһах үтүөрбүт. Дьокуускай куоракка эпидемиологическай балаһыанньа тубустаҕына, өрөспүүбүлүкэҕэ даҕаны ыалдьыбыт дьон аҕыйаан иһиэҕин бэлиэтээтэ.
Хааччахтааһын эрэсиимэ, бастатан туран, бөдөҥ нэһилиэнньэлээх пууннарга бэс ыйын 14 күнүгэр диэри уһуурун иһитиннэрдэ. Эбии Нам улууһун хаҥас биэрэгэр сытар нэһилиэктэргэ, ону тэҥэ, Мэҥэ Хаҥалас улууһун Хара, Майа сэлиэнньэлэригэр диэтэ.
Онон өрөспүүбүлүкэ, ордук Дьокуускай куорат олохтоохторо дьиэҕэ олоруу эрэсиимин тутуһалларыгар ыҥырда.
Людмила ПОПОВА, “Саха сирэ” хаһыат, edersaas.ru
Хаартыска: TV Томск