Саха сирэ РФ Былааҕын күнүн бэлиэтиир

Бөлөххө киир:

Атырдьах ыйын 22 күнүгэр РФ Судаарыстыбаннай былааҕын күнэ бэлиэтэнэр. Бу бырааһынньык РФ Президенин 1994 с. Ыйааҕынан баар буолбута.

 edersaas.ru


Судаарыстыбаннай былаах күнэ Саха Өрөспүүбүлүкэтигэр сылтан сыл аайы киэҥ далааһыннаахтык ыытыллар.

Атырдьах ыйын 19 күнүгэр Н.Н.Тарскай аатынан «Туймаада» стадиоҥҥа футболга өрөспүүбүлүкэтээҕи табаарыстыы турнир ыытылынна. СӨ национальнай-култуурунай холбоһуктара (Армения, Кыргызстан, Азербайджан, Татарстан, Тыва уо.д.а.) кыттыылаах турнир Абый, Анаабыр, Орто Халыма, Усуйаана улуустарын үбүлүөйдээх күннэригэр, ону тэҥэ, халаан уутуттан эмсэҕэлээбиттэри өйөөһүҥҥэ ананна. Билиэттэртэн киирбит үп-харчы кинилэргэ бэриллиэҕэ. Барыта 80 тыһыынча солкуобай хомулунна. Футбол икки күннээх күрэхтэһиитэ СӨ Гражданскай уопсастыба институттарын сайыннарыыга министиэристибэтин, СӨ норуоттарын ассамблеятын өйөбүллэринэн ыытылынна.

Бу күн өссө биир үөрүүлээх түгэнинэн хаарбах дьиэлэртэн көһөөччүлэргэ аналлаах бырагырааманан саҥа дьиэҕэ күлүүһү туттарыы буолла. Маннык дьоллоох түгэн Герман Титов уулуссатын 2/1 дьиэтигэр көһөн киирээччилэргэ тосхойдо.

Атырдьах ыйын 22 күнүгэр 11.30 чаастан Ленин болуоссатыгар «Мин былааҕым» патриотическай ааксыйа ыытылынна. Ленин болуоссатыгар 385 миэтэрэ уһуннаах былаах тэлгэннэ. Бу ааксыйаҕа 200-тэн тахса киһи: уопсастыбаннай деятеллэр, устудьуоннар этэрээттэрин, омуктар общиналарын бэрэстэбиитэллэрэ уонна «Сосновый Бор» лааҕыр иитиллээччилэрэ кытыннылар.

Куорат олохтоохторо уонна ыалдьыттара 12. чаастан үөрүүлээх миитиҥҥэ уонна бырааһынньыктааҕы кэнсиэргэ муһуннулар.

Үөрүүлээх тэрээһиҥҥэ Саха сирин бырабыыталыстыбатын бэрэссэдээтэлин солбуйааччы Михаил Гуляев, СӨ Судаарыстыбаннай мунньаҕын (Ил Түмэн) дьокутаата Ольга Балабкина, Дьокуускай куорат баһылыгын бастакы солбуйааччы Дмитрий Садовников, СӨ Судаарыстыбаннай Мунньаҕын (Ил Түмэн) уонна Куорат Дууматын дьокутааттара, бэлитиичэскэй баартыйалар салайааччылара уо.д.а. кытыннылар.

Куорат олохтоохторо уонна ыалдьыттара көҥүл тустууга СӨ үтүөлээх тренерэ Василий Стручкову, сурдлимпийскай сайыҥҥы оонньуулар кыайыылаахтара Василий Стрекаловскайы, кыттыбыт спортсменнары Валерий Чемпосовы, Егор Скрябины, Евдокия Каторгинаны уо.д.а. уруйдуу көрүстүлэр.

Саха сирин бырабыыталыстыбатын бэрэссэдээтэлэ Евгений Чекин:

Судаарыстыбаннай былаах күнэ биһиги историябытыгар тапталы уонна ытыктабылы иитиэхтиир. Судаарыстыбаннай былааҕы өрө көтөҕөн, биһиги туох баар хайысхаҕа үрдүкү үктэллэри дабайабыт. Арассыыйа былааҕын аан дойдуга билэллэр. Биһиги дойдубут элбэх уустук кэмнэри ааспыта. Билигин эмиэ чэпчэкитэ суох кэмнэр тураллар. Ол гынан баран, ону биһиги чиэстээхтик туоруубут, былаахпытын чиэстээхтик илдьэ сылдьабыт. Судаарыстыба былааҕа – бастатан туран, дойдубут историятыгар, улуу култуурабытыгар, биһиги норуоттарбыт тыһыынчанан үгэстэригэр ытыктабыл бэлиэтэ. Биһиги былаахпыт модун Арассыыйа иллээх-эйэлээх халлааныгар тэлибирии турдун!» – диэн куорат олохтоохторун уонна ыалдьыттарын патриотизм тыыныгар иитэр судаарыстыбаннай бырааһынньыгынан эҕэрдэлээтэ.

Судаарыстыбаннай былааҕы өрө көтөҕөр чиэс Саха сирин кадеттарын интэринээт-оскуолатын үөрэнээччилэригэр тигистэ. Бу күн соторутааҕыта 18 саастарын туолбут ыччаттарга пааспардарын үөрүүлээх быһыыга-майгыга туттардылар.

Орджоникидзе болуоссатыгар «Дотронься до России» ааксыйаҕа бырааһынньыгы кэрэһилиир атрибутикалары түҥэттилэр.

Судаарыстыбаннай былаах күнүн киэһэ Ленин болуоссатыгар уоттаах-күөстээх шоу түмүктүөҕэ.

Бу күннэр тухары Былаах күнүгэр аналлаах роликтар «Саха» НКИХ биэриилэригэр тиһигин быспакка көрдөрүлүннүлэр. Өрөспүүбүлүкэ олохтоохторо Судаарыстыбаннай былаах күнүн туһунан санааларын аһаҕастык үллэһиннилэр.

Надежда ЕГОРОВА, «Саха сирэ» хаһыат, edersaas.ru

Мария ВАСИЛЬЕВА уонна ааптар  түһэриилэрэ

+1
0
+1
0
+1
0
+1
0
+1
0
+1
0
+1
0