Төрөөһүн көрдөрүүтүнэн уонна нэһилиэнньэ ахсаана эбиллиитинэн Саха сирэ Уһук Илин эрэгийиэннэриттэн бастакы миэстэҕэ таҕыста. Оттон Арассыыйаҕа сэттэ бастыҥ иһигэр киирдэ. Ол туһунан доруобуйа харыстабылын миниистирэ Елена Борисова иһитиннэрдэ.
Былырыын тохсунньу-сэтинньи ыйдарга төрөөһүн көрдөрүүтүн ылар буоллахха, 1000 киһиэхэ 13,3 оҕо төрөөбүт. Бу Арассыыйатааҕы итинник көрдөрүүтүттэн 30,4%-нан үрдүк. Өлүү көрдөрүүтэ – 1000 киһиэхэ 7,9 өлүү тиксэр. Бу атын эрэгийиэннэри кытары тэҥнээтэххэ, 35,8%-нан намыһах.
Биллэрин курдук, саамай элбэх өлүү сүрэх-тымыр ыарыыларын кытары сибээстээх. Саха сиригэр 100 тыһыынча киһиэхэ тиксэринэн 354,5 киһи сүрэх-тымыр ыарыыларыттан өлөр эбит. Бу атын эрэгийиэннэр көрдөрүүлэриттэн балтараа төгүл намыһах. Искэн ыарыыларыттан 100 тыһыынча киһиэхэ тиксэринэн 142,6 киһи өлөр, бу атыттартан 14 төгүл кыра.
“Онон, “Демография”национальнай бырайыак олоххо киириитин биир ситиһиитинэн киһи олоҕо уһаабыта уонна төрөөһүн элбээбитэ буолар. Өрөспүүбүлүкэҕэ киһи орто сааһа – 71,7 сыл, ол иһигэр дьахталларга – 77,1 сыл, эр дьоҥҥо 66,4 сыл. Бу Уһук Илиҥҥэ саамай үрдүк көрдөрүү”, — диэн Елена Борисова бэлиэтээтэ.
Ону тэҥэ, нэһилиэнньэ ахсаана кыралаан эбиллэр. Уһук Илиҥҥэ уонна атын эрэгийиэннэргэ нэһилиэнньэ ахсаана түһэ турар буоллаҕына, бу куһаҕана суох көрдөрүү.
Ангелина Васильева, “Саха сирэ” хаһыат, edersaas.ru