Ааспыт сайыҥҥыттан саҕаламмыт «Саха сиригэр оҥоһулунна» хамсааһын 80 тыа хаһаайыстыбатын табаарын оҥорооччулары түмтэ. edersaas.ru
Кинилэр үүтү-эти, балыгы, сир аһын уонна бурдугу астаан-үөллээн, экологическай өттүнэн ыраас, сибиэһэй бородууксуйа биир тыһыынчаттан тахса көрүҥүн оҥорон батараллар. Санатан эттэххэ, бу бырайыак олохтоох табаары оҥорооччулары өйүүр, батарыы ситимин кэҥэтэр, оттон нэһилиэнньэни экология өттүнэн куттала суох аһынан хааччыйар сыалтан 2017 с. от ыйын 1 күнүттэн олоххо киллэриллибитэ. Билигин киин куорат 50 маркетыгар, ол иһигэр «Айгуль», «Алмаз» курдук бөдөҥ эргиэн кииннэригэр, «Дьокуускайдааҕы килиэп кэмбинээтэ» ААУо маҕаһыннарыгар улуустартан киллэриллибит үрүҥ ас уонна эт эгэлгэтин киһи үөрэ көрөр уонна хамаҕатык атыылаһар. Ордук элбэх аһы-үөлү «Сахаагропродукт», «Туймаада-Агроснаб», «Дьокуускайдааҕы көтөр фабриката» ААУо-лар, «Сахаконсервпродукт», «Скиф», «Горнай-Ас», «Кладовая Олекмы», «Таба», «Байкал», «Ягоды Якутии» ХЭУо-лар, оттон үрүҥ ас арааһын «Амма», «Таатта», «Байар», «Чурапчы», «Эрэл» кэпэрэтииптэр хааччыйаллар. Бырайыак күннэтэ кэҥиир. Бу күннэргэ алмаастаах түбэ биир куоратыгар, Удачнайга “Баат” маҕаһыыҥҥа олохтоох ас-үөл салаата арылынна, Москваҕа «Фуд-Сити» кууһунан эргиэн киинигэр Саха сириттэн илдьиллэр эт, балык атыыланар буолла. Тыа хаһаайыстыбатын уонна ас-үөл бэлиитикэтин министиэристибэтэ быйыл бу бырайыагы киин улуустарга уонна Саха сирин соҕурууҥҥу түбэтигэр киллэрэргэ үлэлиир былааннаах.
«Саха сиригэр оҥоһулунна» бренд киллэриллибитэ көдьүүстээҕин олохтоох бородууксуйаны оҥоруу таһыма үрдээбитэ туоһулуур. Ол курдук, ааспыт 2017 сылга үрүҥ ас кэккэ көрүҥнэрин оҥоруу хас эмэ төгүл, сибиинньэ этин оҥорон таһаарыы 37 % үрдээбит.
Раиса Сибирякова, edersaas.ru