Бу күннэргэ «Саха сирин киэн туттуута» норуот бириэмийэтин бырайыагын чэрчитинэн «Бастыҥ учуутал» номинация финалистара билиннилэр. edersaas.ru
Киминэн киэн туттарын норуот бэйэтэ талар!
«Сахамедиа» өрөспүүбүлүкэтээҕи иһитиннэрэр-бэчээттиир холдинг бииртэн биир кэрэхсэбиллээх бырыйыактары олоххо киллэрэр. Судаарыстыбаннас күнүн чэрчитинэн өрөспүүбүкүлэ сайдыытыгар кылааттарын киллэрэ сылдьар дьону сырдатар, кинилэргэ уопсастыбаннас болҕомтотун тардар сыалтан саҥа бырайыагы — «Саха сирин киэн туттуута» норуот бириэмийэтин – саҕалаата. Бырайыак чэрчитинэн, өрөспүүбүлүкэ олохтоохторо Саха сирэ киэн туттар чулуу дьоннорун итиэннэ ураты өйдөбүллэрин, кэрэ-бэлиэ көстүүлэрин талыахтара. Онуоха куоластааһыҥҥа үлэҕэ-хамнаска ситиһиилэрдээх, дьоҥҥэ-сэргэҕэ ытыктанар дьоннор, кэлэктииптэр, биһиги тыйыс эрээри кэрэ айылҕалаах дойдубут ытык сирдэрэ, бэлиэ көстүүлэрэ туруоруллуохтара.
Учууталлар саҕалаатылар
Саҥаны, кэрэни уонна үйэлээҕи тарҕатар дьону, учууталлар, хайа да кэмҥэ өрө тутуллаллар. Ол иһин, саҥа бырайыак аанын “Учуутал” номинация тэлэйэ аста, маныаха соторутааҕыта Учуутал күнэ бэлиэтэммитэ эмиэ оруолу оонньоото. Алтынньы 4 күнүттэн өрөспүүбүлүкэ улуустарыттан 88 номинант туруоруллан, сайтынан куоластааһын саҕаланна. Хандьыдааттар бары даҕаны бииртэн биир талбыт курдуктар, өр сыл үлэлээбит уопуттаах педагогтары сэргэ саҥа үлэлээн-хамсаан эрэр эдэр, кэскиллээх дьоннор бааллар. Ол курдук, манна Чурапчы физкультураҕа учууталын Владислав Кривошапкины, Үөһээ Бүлүүтээҕи гимназия учууталын Бурхалей Макаровы, Уус Маайа Күбүттэн Петр Павловы, Булуҥтан Рабелла Мухоплеваны, Эдьигээнтэн эдэркээн Юнна Ширяеваны уо.д.а. көрүөххэ сөп.
Хайдах куоластанарый?
Куоластааһын Интернетинэн ыытыллар. Уsia.ru сайтка «анал бырайыактар» сыылканы арыйан «Саха сирин киэн туттуута» норуот бириэмийэтин бырайыагар киирдэххэ, номинаннар мэтириэттэрэ, ааттара-суоллара, ханна үлэлииллэрэ тахсар. Онон көрөн номинант хаартыскатын үөһэ өттүнээҕи уҥа муннугар баар «лайкы» баттаан куоластанар. Ыраах улуустарга Интернет сибээһэ төһө да мөлтөх буоллар, куоластааһыҥҥа дьон балачча көхтөөхтүк кытынна. Үгүстэр мобильнай төлөпүөн көмөтүнэн, ватсаабынан, куоластаатылар. Онуоха сайтка анал регистрацияланыы ирдэммэт, биир тэрилтэн (компьютертан, суотабай төлөпүөнтэн) биир эрэ киһиэхэ итиэннэ биирдэ эрэ куоластанар.
Долгутуулаах түгэн
Эрдэттэн биллэриллибитин курдук, финалистары быһаарыы алтынньы 10 күнүгэр күнүс 12 чаастан Бэчээт дьиэтигэр, «Сахамедиа» холдиҥҥа буолла. Бырайыагы иилиир-саҕалыыр Григорий Фоменко иһитиннэрбитинэн, финалга саамай элбэх куолаһы ылан, биэс учуутал тахсыбыт. Бу бааллар кинилэр:
1. Ольга Попова — Уус Маайа орто оскуолатын алын кылаастарга учуутала, үрдүк категориялаах педагог, СӨ үөрэҕин туйгуна, “Учууталлар учууталлара” бэлиэ хаһаайката. 1022 киһи куоластаабыт.
2. Луиза Мальцева – Сэбиэскэй Сойуус Дьоруойа Н.С. Степанов аатынан Бүлүү 3 №-дээх орто оскуолатын алын кылааһын учуутала, 1990-с сыллартан үөрэнээччилэр кылааһы таһынан дьарыктарын тэрийиигэ туһаайыллыбыт “Бииргэ үлэлээһин оскуолата” бырайыагынан үлэлиир инноватор. 986 киһи куоластаабыт.
3. Валентина Дьячковская – Амма улууһун Бөтүҥ орто оскуолатын химияҕа уонна биологияҕа учуутала. Идэтин дэгиттэр баһылаабыт, научнай-практическай конференцияларга көхтөөхтүк кыттар, иитэр-үөрэтэр маастарыстыбатын киэҥник тарҕатар педагокка 929 киһи куолаһын биэрбит.
4. Ирина Пахомова — М.П.Кочнев аатынан Нерюнгри 1 №-дээх орто оскуолатын омук тылыгар учуутала. Билиитин утумнаахтык хаҥатар, үрдүк категориялаах учууталга 927 киһи куоластаабыт.
5. Владислав Кривошапкин — С.А.Новгородов аатынан Чурапчы орто оскуолатын физкултуураҕа учуутала. Оҕону эт-хаан өттүнэн эрчийиигэ компьютер технологиятын айымньылаахтык туттар педагокка 919 киһи куоластаабыт.
Финалга киирбиттэр быһаарыллыбыттарын кэнниттэн, биһиги киһи аймах күүстээх аҥарын соҕотох бэрэстэбиитэлигэр эрийэ сырыттыбыт.
— “Учуутал” номинацияҕа киллэриллибиппин кэргэммиттэн истибитим, оттон биэс киһи иһигэр киирбиппин бу саҥа истэбин, — диэтэ Владислав Николаевич. — Туһугар киһи соһуйар да, үөрэр да дьыалата. 1980 сыллаахтан учууталлыыбын, бастаан Сылаҥ оскуолатыгар үлэлээбитим, 1997 сылтан Чурапчы орто оскуолатыгар баарбын. Бу тухары элбэх киһини кытары алтыһан, үгүс оҕону үөрэтэн кэллэҕим. Ытыктабылларын биллэрэн куоластарын биэрбиттэригэр махтанабын.
Кыайыылаах аныгы нэдиэлэҕэ быһаарыллар
Элбэх куолаһы ылан, финалга тахсыбыттарга сарсыҥҥыттан, ол эбэтэр алтынньы 11 күнүттэн туспа куоластааһын тэриллэр. Кыайыылаах алтынньы 23 күнүгэр быһаарыллыаҕа. Күндү ааҕааччылар, түгэни мүччү тутумаҥ, куоласкытын биэриҥ. Биһиги киэн туттар дьоһун-мааны дьоннордоохпутун биллэриэҕиҥ!
Раиса Сибирякова, “Саха сирэ” хаһыат, edersaas.ru