Саха гимназията ыам ыйын 26 күнүгэр оскуола ыһыаҕын ыста. Төрүт үгэскэ оҕону уһуйуу, духуобунаска сыһыарыы үтүө холобурун атын да үөрэх кыһалара, учууталлар, төрөппүттэр батыһыах тустаахтар.
Чокуур Гаврильев, edersaas.ru
Туймаада ыһыаҕын курдук сарсыардаттан массыыналар бытаан халҕалаһалара Үс Хатыҥ диэки сыыйылынна. Аара суолга 17-с уонна 33-с нүөмэрдээх оскуолалар, Саха корейскай оскуола ыһыахха барар аартыктарын ыйан-кэрдэн биэрэр табличкалары көрөн, сыл аайы ыһыах ыһар үөрэх кыһаларын ахсаана элбии турарыттан астынныбыт.
Ыһыах буолар сирин-уотун массыынанан тэбистэрбэттэр эбит. Туспа парковкаттан киирэн, кылаастарынан ыйыллыбыт сиргэ түһүлгэлээн түһэн, көҕү-нары оройуттан туттубут.
Төрөппүттэр үйэлээх мастан бэйэлэрэ оҥорбут түһүлгэҕэ киирэр ааннара аҕалар түмсүүлэрин бачыымын кэрэһэлиир.
Ыһыах арыллыытын сиэрин-туомун С.А.Зверев-Кыыл Уола Национальнай үҥкүү тыйаатырын солиһа, РФ уонна СӨ үтүөлээх артыыһа ыытта. Киниэхэ алтыс кылаас оҕолоро көмөлөстүлэр. Биир сөхпүтүм диэн, төрөппүттэр бэйэлэрэ ансаамбыл тэринэн, куба буолан үҥкүүлээтилэр, ыллаан дьиэрэттилэр.
Ыһыах ыһыах курдук спортивнай оонньуулаах, күрэхтэһиилээх буолла.
Маны таһынан, алын уонна орто сүһүөх кылаастарга «Саха ыала» диэн куонкурус ыытылынна. Улахан кылаастар флеш-моб көрдөрөн, туспа сыана быстылар. «Саха ыала» диэн күрэххэ ох курдук оҥостон, сахалыы таҥнан -симэнэн кэлбит ыаллар, талааннарын арыйдылар: сорох асчыт бэрдэ эбит, сорох уран тарбахтаах уус. Ыаллар ыллаан дуорайдылар, үҥкүлээн эргийдилэр, көлүөнэнэн оһуокайдаан ньиргиттилэр.
«Саха ыала» куонкурус дьүүллүүр сүбэтин бэрэссэдээтэлэ Зоя Багынанова: «Ыаллар оҕолорун олус үчүгэйдик иитэллэрин илэ харахпытынан көрдүбүт. Бэртээхэй тэрээһин буолла. Бу оскуоланы истэн, биһирээн, мин хос сиэним улахан куонкуруһу ааһан, бу сахалыы тыыннаах оскуолаҕа киирэн, үүнэ-сайда сылдьарыттан олус үөрэбин», — диэн санаатын аһаҕастык үллэһиннэ.
Саха сиэринэн самаан сайыны көрсө оскуола ыһыаҕын ыһыы, оҕону иитиини таһынан, төрөппүтү, учууталы сомоҕолуур ураты суолталаах. Дириэктэр, педагогичскай наука кандидата Валентина Сафронеева бэлиэтээбитинэн, аҕыйах сыллааҕыта ыһыах тэрээһинин барытын оскуола бэйэтэ сүгэр эбит буоллаҕына, билигин төрөппүттэр иилээн-саҕалаан ыытар эбиттэр, кылаастар сыл аайы эппиэттээх хайысханы үлэлэтэр эбиттэр.
Хаартыскалары Ykt.ru саайтан ыллыбыт.
Чокуур Гаврильев, edersaas.ru