Саха дьахталларын сойууһа Забайкальскай кыраайга иэдээҥҥэ түбэспиттэргэ көмө оҥорорго ыҥырыы таһаарда
Бу күннэргэ Уһук Илиҥҥи уокурук дьахталларын сойуустара Забайкальскай кыраайга улахан тыалтан буолбут истиэп баһаарыттан эмсэҕэлээбит дьиэ кэргэттэргэ ким туох кыахтааҕынан көмөлөһөн эрэллэр.
edersaas.ru
Саха сирин дьахталлара аһымал хамсааһыҥҥа эмиэ кытталларын биллэрдилэр. Бу туһунан СӨ Дьахталлар уопсастыбаннай тэрилтэлэрин сойууһун бэрэссэдээтэлэ, РФ Дьахталлар сойуустарын Бюротун чилиэнэ Анжелика Андреева маннык иһитиннэрдэ:
— Истиэп баһаара Забайкальскай кыраай аҕыс оройуонун 17 нэһилиэгин күл-көмөр оҥордо.
Аҕыйах хонук иһигэр дьон олорор дьиэлэриттэн, сүөһүлэриттэн, өр сылларга муспут баайдарыттан-дуолларыттан илии соттон хааллылар. Ол курдук, 150 олорор дьиэ умайда, 650 Забайкальскай кыраай олохтооҕо билигин биһиги көмөбүтүгэр наадыйар.
Биһиги өрөспүүбүлүкэбит дьахталларын уопсастыбаннай сойуустара улуустар уонна нэһилиэктэр дьахталларын сэбиэттэригэр, уопсастыбанньык дьахталларга, ыал ийэлэригэр, лиидэр кыргыттарга туһаайан Ыҥырыы таһаардыбыт. Эр киһиэхэ, дьахтарга, оҕоҕо сөптөөх саҥа таҥаһы, бородууктаны, утуйар таҥаһы Дьокуускай куорат Курашов уулуссатын 24 №-гэр, 405 хоско хомуйабыт. Бу СӨ Дьахталлар уопсастыбаннай тэрилтэлэрин сойууһун офиһа. Өрөспүүбүлүкэтээҕи Уопсастыбаннай кииҥҥэ баарбыт. Ким харчынан көмөлөһүөн баҕалаах эмиэ бу кэбиниэккэ кэлэн билсэригэр көрдөһөбүт. Хас биирдии көмөлөспүт киһи аата-суола регистрацияланыаҕа.
Күндү Саха сирин дьахталлара! Забайкальскай кыраайга иэдээҥҥэ түбэспит ыалларга, кинилэр оҕолоро оскуолаҕа үөрэхтэрин этэҥҥэ түмүктүүллэригэр өйөбүл, көмө буолуоҕуҥ диэн ыҥырабыт.
Аһымал көмөнү оҥорууга кыттыһар дьон бу этиллибит аадырыска үлэ күнүгэр күнүс 14 ч. киэһэ 18 ч. диэри кэлэргитин кэтэһэллэр.
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.