Атын киһи харчытын ааҕар, онно ымсыырар, ордугургуур куһаҕан эрээри, дойдуга баай-дьадаҥы икки арда аттар атан, кэҥээн, дириҥээн иһэр. Ону үрдүк сололоох дьокутааттар хамнастара туоһулуур. Нолуогабай уоргаҥҥа 2017с. түмүгүнэн декларация отчуоттуур хампаанньа түмүктэнэн, ким төһө хамнастааҕын, туох баайдааҕын тэҥнээн көрүөҕүҥ.
edersaas.ru
Саамай үрдүк дохуоттаах 450 Госдума дьокутааттарын испииһэгин бастакы миэстэтигэр 4,31 млрд. солк. сыллааҕы дохуоттаах Григорий Еникеев таҕыста.
Иккиһи 1,14 млрд оҥорбут Николай Борцов ылла.
734, 39 мөл. аахсыбыт Леонид Симановскай үһүс миэстэҕэ тигистэ.
Саамай баай дьокутааттар бары «Биир ньыгыл Арассыыйа» баартыйа чилиэннэрэ.
Бастакы миэстэҕэ турар халыҥ харчыны хамсатар дьокутааппыт ыйга быһа холоон, 359 мөл. дохуоттаах. Бу дьону биһиги манна олорон кимнэрин-туохтарын, хантан итиччэ үлүгэрдээх үбү оботторон ылалларын түһээн да баттаппаппыт.
Арыый син кулгаахпыт уһугунан ааттарын-суолларын истэн аһарар дьоммутун ылан көрдөххө, вице-премьер, Уһук Илин федеральнай уокурукка дойду бэрисидьиэнин бэрэстэбиитэлэ Юрий Трутнев 2017с. 377,3 мөл. солк. оҥорбут.
В.Путин пресс-сэкиритээрэ Дмитрий Песков сыллааҕы хамнаһа 14,3 мөл. тэҥнэспит.
Оттон Саха сирин интэриэһин Госдумаҕа көмүскүүр дьокутааттар сыллааҕы хамнастара 4,9 — 5,4 мөл. солк. тэҥнэһэн, ыйга 400 — 450 000 тыһ. солк. «Сиэрдээх Арассыыйа» дьокутаата Федот Тумусов былырыын 5,3 мөл. солк., «Биир ньыгыл Арассыыйа» бэрэстэбиитэлэ Галина Данчикова 5 мөл. аахсыбыттар.
Ил Түмэн саамай баай дьокутаата, экономическай, инвестиционнай, бырамыысыланнай бэлиитикэҕэ, урбааҥҥа, туризмҥа уонна инфраструктураны сайыннарыыга бастайааннай кэмитиэт бэрэссэдээтэлэ Виктор Федоров 2017 с. түмүгүнэн 104, 213 мөл. харчыны оҥорбут. Кини бас билиитигэр икки сир учаастага, 3 квартира, 216 кв. м. иэннээх чааһынай дьиэ, 3 гараж, баанньык, офис сурулла сылдьар. Ону таһынан, 4 массыыналаах, — Toyota Land Cruiser, УАЗ-29891, УАЗ «Трэкол-39041», BMW X5. Өссө ууга устар Beyliner катердаах, Крым мотуоркалаах.
Федоров кэргэнэ 2017 с. 4 мөл. солк. дохуот ылбыт. Кини бас билиитигэр үс кыбартыыра, онтон биирдэстэрэ 229 кв. м. иэннээх Испанияҕа баара бэлиэтэммит.
Иккис миэстэҕэ ньыгыллар кэккэлэриттэн Өлүөхүмэ улууһуттан дьокутаат, таһаҕас тиэйэр тэрилтэ салайааччыта Сергей Краснов ааспыт сылга 41,2 мөл. солк. оҥордо. Кини кэргэнэ сылга 743 276 солк. хамнастаммыт.
Ил Түмэн үс саамай баай дьокутааттарын ахсаанын хотугу национальнай уокуруктан дьокутаат, «Арктик-капитал” дириэктэрдэрин сүбэтин бэрэссэдээтэлэ Иван Андреев түмүктээтэ. Кини сыллааҕы дохуота 41,042 мөл. тэҥнэспит. Кэргэнэ 2,604 мөл. аахсыбыт.
Ити курдук таҥара маанылаабыт, үллэ турар халыҥ харчынан хадаҕалаабыт дьоно ыйга хастыы да мөлүйүөнүнэн хамнастаналлар.
Марианна Тыртыкова, «Саха сирэ», edersaas.ru