Федот Потапов аатынан Амма улууһун култуураҕа дьиэтигэр Саха сирин норуоттарын спортивнай оонньууларын саахымакка күрэхтэһиитэ ыытылла турар. Бүгүн оонньуу үһүс күнэ. Манна былырыын сүүмэрдиир күрэхтэһиигэ ситиһиилээхтик кыттыбыт 10 хамаанда кыттар. Хамаанда састаабыгар 3 эр киһи, 1 дьахтар киирэр.
Күрэхтэһии хаамыытын туһунан биһиги хаһыаппыт доҕоро, суруналыыс, өрөспүүбүлүкэтээҕи Саахымат киинин инструктора, Арассыыйа саахымакка бастакы категориялаах судьуйата Афанасий Васильевич Павлов билиһиннэрэр:
— Оонньуу саахымакка күрэхтэһиитигэр үгэс быһыытынан Дьокуускай, Таатта, Үөһээ Бүлүү, Нам, Уус Алдан, Сунтаар хамаандалара күүстээхтэр. Кинилэр сүрүннээн спорт маастардарыттан, маастарга кандидаттартан састааптаахтар. Билигин сэттис туур буола турар. Бүгүн үс туур оонньонон, күрэхтэһии бүтүөхтээх. Сэттэ туур түмүгүнэн Дьокуускай 20,5, Таатта 16, Нам 15,5, Үөһээ Бүлүү 15 очукуолаах инники иһэллэр.
Биирдиилээн дуоскаларынан эттэххэ, маастар Роман Ганжуров (Дьокуускай), маастарга кандидаттар Юрий Родионов (Үөһээ Бүлүү) уонна Галина Эверстова (Дьокуускай) билиҥҥитэ үчүгэй көрдөрүүлээхтэр.
Хаалбыт бүтэһик туурдарга Таатта-Дьокуускай, Нам-Үөһээ Бүлүү хамаандаларын сирэй көрсүүлэрэ, бириистээх миэстэни ханнык хамаандалар ылалларын быһаарыаҕа.
Петр Павлов.