Ил Дархан Айсен Николаев сыстыганнаах дьаҥ кэмигэр экэниэмикэ туруктаах буолуутугар туһаайыллыбыт суһал ыстаап мунньаҕын ыытта.
edersaas.ru
Мунньахха өрөспүүбүлүкэтээҕи туһааннаах биэдимистибэлэр, тутуу тэрилтэлэрин салайааччылара кыттыыны ыллылар.
Тутууга үлэлиир тэрилтэлэр сыстыганнаах дьаҥ кэмигэр көрсүбүт уустук боппуруостарын билиһиннэрдилэр. Ол курдук, докумуону толорууга, каадыр чааһыгар, тутуу матырыйаалынан уонна туттар тэрилинэн хааччыйыыга уустуктар үөскүүллэр эбит.
— Тутуу хаамыыта, саҥа дьиэлэри олоххо киллэрии тэтимэ олох бытаарда. Кэлиҥҥи кэмҥэ чэпчэтиилээх ипотека чэрчитинэн сибээстээн, саҥа тутуллар дьиэҕэ наадыйааччы элбээтэ. Онон федеральнай бырагырааманан оҥоһуллар үбүлээһини кэмигэр туттан иһэр инниттэн, дьиэ тутуугар саҥа саҕахтары торумнуур уолдьаста, — диэн бэлиэтээн туран, өрөспүүбүлүкэ Аҕа баһылыга тустаах министиэристибэҕэ кэккэ сорудаҕы биэрдэ.
Бүгүҥҥү күҥҥэ тутуу тэрилтэлэригэр 1500 киһиттэн ордук үлэһит наада. 864 киһи Дьарыктаах буолуу сулууспатыгар учуокка турар.
Ил Дархан үлэлииргэ бэлэм дьону тутуу былааһаккаларынан тарҕатан, үлэнэн хааччыйарга сорудахтаата.
Елена ПОТОЦКАЯ, «Саха сирэ» хаһыат, edersaas.ru
Хаартыска — Мария Васильева.