Саҥа сылы «Күүдээринэ күүрээн» арыйыаҕа
Олох-дьаһах

Саҥа сылы «Күүдээринэ күүрээн» арыйыаҕа

Кэлэр нэдиэлэ саҥатыттан «Саха» НКИХ «Күүдээринэ күүрээн» киинэнэн бу сыллааҕы сериаллары көрдөрүүтүн саҕалыаҕа.

edersaas.ru

Ааспыт сылга уһуллубут сериаллартан бу бүтэһиктэрэ буолар. Киинэ режиссёра  Марина Платонова  сериалы устуу эйгэтигэр саҥа аат буолбатах. Кини бу иннинэ устубут »Ааспыт ааспат амтана» диэн айымньыта көрөөччү болҕомтотун, биһирэбилин ылбыта. Бу туһунан сериаллары таһаарар салаа салайааччыта Марина Пермякова сериал сүрэхтэниитигэр бэлиэтээтэ.

Бу сырыыга да аатыттан саҕалаан — «Күдээринэ күүрээн» сериалга сахалыы тылга-өскө, өйдөбүллэргэ болҕомто ууруллубута көстөр.   Үгүс киһи: «Бу туох диэн суолталаах өйдөбүлүй?» — диэн ыйытыыта, тылбыт-өспүт баайын умна быһыытыйбыппытын көрдөрөр. Онон билигин көрөөччү дьүүлүгэр киһи киһиэхэ сыһыана, олоххо баар чахчылар дьон дьылҕатыгар дьайыылара, дууһа туруга, өй-санаа сайдыыта, тургутуулары туорааһын,  көлүөнэ сибээһин көстүүлэрэ таҕыста.


Киинэ устар хамаандата көрөөччүлэрин кытта көрсүһүүлэригэр дириҥ ис хоһоонноох кэпсэтии таҕыста. Манна киинэни устубут уонна онно уһуллубут дьон араас долгутуулаах түгэннэрин аҕыннылар. Кэпсэтиигэ интернет социальнай ситимнэригэр араас тиэмэни сырдатар блогердар, хампаанньа ыытар үлэтин сэргээччилэр кыттыыны ыллылар.

Биллэн турар, киһи биир серияны көрөн баран, бүтүн сериалга сыана биэрбэтэ чахчы. Киинэҕэ уһуллубут артыыстар састааптарыгар анал үөрэхтээх, уопуттаах, көрөөччү биһирэбилин ылбыт тыйаатыр артыыстара бааллар.  Кэлиҥҥи сылларга үлэлэрэ тыйаатырдыы хайысхаламмыт эстрада артыыстара — биллэр-көстөр үлэлээх ырыаһыттар, көстүбүт сериалларга уһуллан, номнуо көрөөччү биһирэбилин ылбыт талааннаах дьон киинэ сүрэхтэниитигэр санааларын эттилэр.


Мин, саас ортолоох киһи быһыытынан, ис сүрэхпиттэн үөрэрим диэн — бу киинэҕэ сахалыы өйдөбүл, тылга-өскө болҕомто, тыа сирин олоҕун-дьаһаҕын көстүүлэрэ, көлүөнэ ситимэ баар.
Биһиги боростуой, артыыс буолбатах дьон, элбэҕи-билэр көрөр эдэр артыыстары кытта алтыспыппыт үгүһү биэрдэ.

Киинэни ырыппыт Георгий Белоусов, Ньургуйаана Егорова режиссёр уонна артыыстар үлэлэрин сэргэ техническэй тутул (тыас-уус, уот-күөс, кадртан кадрга көһүү, ис туругу көрдөрүүгэ көмө ньыманы көрдөрүү) — бу айар састаап күүстээҕин бэлиэтэ буоларын ыйдылар, бэлиэтээтилэр.

Киинэҕэ уһулларга (оруоллара кыратыттан улаханыттан тутулуга суох) сөбүлэҥнэрин биэрбит, бэриниилээхтик үлэлээбит үтүөкэн дьоммутугар — Михаил Апросимовка, Ильяна Павловаҕа, Байтыкан Батаакапка, Аркадий Николаевка, Айсен Лугиновка, Алдан Готовцевка, Александра Сивцеваҕа, Клавдий Афанасьевка, Саргылаана Гороховаҕа биһиэхэ бэртээхэй сериалы бэлэхтээбиттэригэр барҕа махтал тылын этэбит.


Дьэ, онон доҕоттор, тохсунньу 13 күнүттэн түөрт нэдиэлэ устатата эһиги болҕомтоҕутугар уонна дьүүлгүтүгэр  —  »Күдээринэ күүрээн» сериал!

Наталья РУФОВА, Хатас нэһилиэгэ

«Саха сирэ» хаһыат, edersaas.ru

Хаартыска — Елена Потоцкая түһэриитэ

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

тринадцать − пять =