Саҥа рояльга Александр Корякин оонньоото

Бөлөххө киир:

“Култуура” национальнай бырайыак чэрчитинэн Ньурбаҕа Оҕо ускуустубатын оскуолатыгар саҥа  мусукаалынай үнүстүрүмүөннэри сүрэхтээтилэр. 

edersaas.ru

Бу үнүстүрүмүөннэри үөрэх кыһата “Култуура” национальнай бырайыак чэрчитинэн тутта.

Ол курдук, саҥа рояль сүрэхтэниитинэн сибээстээн,  Ньурбаҕа анаан-минээн кэлэн, пианист, Норуоттар икки ардыларынааҕы куонкурустар лауреаттара Александр Корякин кэнсиэртээтэ.

Лоп-курдук 20 сыл анараа өттүгэр, 1999 сыллаахха, манна, иккис кылаас үөрэнээччитин Саша Корякин аан бастакы сольнай кэнсиэрэ буолбута.  Ол күн Саша 18 айымньыны оонньоон иһитиннэрбитэ.

Күн бүгүн эмиэ, ол 20 сыллааҕыта курдук, Ньурба олохтоохторо эдэр, кэскиллээх  мусукааны олус истиҥник ылынан, өрө көтөҕүллүүлээхтик көрүстүлэр.

“Саха сирин 82 оскуолатыттан биһиги үөрэхпит кыһата 8 иһигэр киирэн, “Култуура” национальнай бырайыак чэрчитинэн саҥа мусукаалынай үнүстүрүмүөннэринэн,  оборудованиенан, үөрэх-методическай литературанан хааччыллыыга анаан, уопсайа 5 462 737 солкуобай суумалаах   субсидия ылар дьоллонуута – бу улахан историческай түгэн.  Биһиги бу үбүнэн икки рояль, акустическай пианино, цифровой пианино, «Юпитер» баян, норуодунай үнүстүрүмүөннэри, интерактыыбынай дуоскалары, ноутбуктары, тыас-уус, уот-күөс оборудованиеларын, оскуола миэбэлин, хореографическай сиэркилэлэри, уо.д.а. араас олус наадалаахпытын ыллыбыт”, — диэн үөрүүлэрин үллэстэллэр Ньурбатааҕы ДШИ үлэһиттэрэ.

Маныаха, үп-харчы үгүс өттө — 4,7 мөл. солкуобай федеральнай бүддьүөттэн көрүллүбүт, оттон өрөспүүбүлүкэттэн 400 тыһыынчаттан тахса солкуобай, муниципальнай бүддьүөттэн 273 тыһ. солкуобай анаммыт.

Быйыл Ньурбатааҕы Ускуустуба оскуолата,  «Алроса-Ньурба» ПАУо дьиэтигэр арендаламмыт 2 этээс  кинилэргэ ананан, лаппа кэҥээтэ. Ол курдук, үөрэх 9 кабинетыгар художественнай, декоративнай-прикладной, театральнай уонна спортивнай-бальнай үҥкүү кылаастара көһөн киирдилэр.

Бу туһунан СӨ Култууратын уонна духуобунай сайдыытын министиэристибэтин пресс-киинэ иһитиннэрэр.

Татьяна МАРКОВА, edersaas.ru

+1
0
+1
0
+1
0
+1
0
+1
0
+1
0
+1
0