СӨ Ил Дархана Егор Борисов бырабыыталыстыба киэҥ ыҥырыылаах мунньаҕар СӨ инвестиционнай сайдыытын уонна предпринимательствоҕа министиринэн Антон Сафроновы анаабытын туһунан иһитиннэрдэ.
Анивера АКИМОВА, «Саха сирэ» хаһыат, https://edersaas.ru/
Санатан эттэххэ, саҥа тэриллибит министиэристибэ салайааччытын дуоһунаһыгар былырыын Россияҕа куонкурус биллэриллибитэ. Дойду араас регионнарыттан 30-ча киһи резюметын ыыппыта.
Саҥа анаммыт миниистир Антон Сафронов Папуа-Новай Гвинеяҕа TOTAL хампаанньа филиалыгар эксплуатация сулууспатыгар начаалынньыгынан үлэлээбитэ. Антон Сафронов Амма улууһуттан төрүттээх. 1988 – 1999 сылларга Амматааҕы 1-гы нүөмэрдээх оскуоланы бүтэрбитэ.
Оттон кини солбуйааччытынан Татьяна Анатольевна Бравина ананна. Кини Санкт-Петербурдааҕы финансово-экономическай университеты бүтэрбитэ. «Якутия» технопарк дириэктэрин солбуйааччытынан үлэлээбитэ. Салайар каадырдар резервэлэригэр баар.
Инвестиционнай сайдыы уонна предпринимательство министиэристибэтин үлэтиттэн өрөспүүбүлүкэҕэ тастан үбү киллэрии, инфраструктураны сайыннарыы, олохтоох оҥорон таһаарыыны өйөөһүн быһаччы тутулуктаныа.
Анивера АКИМОВА.