Бу ыйга саҥа тэриллибит Инвестиционнай сайдыы уонна предпринимательство миниистирин дуоһунаһыгар Россияҕа куонкурус биллэриллибитэ. Билигин араас регионтан 29 киһи сайабылыанньа биэрдэ. Бу туһунан Егор Борисов олохтоох салайыныы сэбиэтин мунньаҕар иһитиннэрдэ.
Санатан эттэххэ, ахсынньыга Ил Дархан бырабыыталыстыбаҕа уларытыыны киллэрбитэ. Саҥа Инвестиционнай сайдыы уонна предпринимательство министиэристибэтэ тэриллибитэ. Бу министиэристибэ инникитин хайдах үлэни ыытарыттан өрөспүүбүлүкэҕэ үбү киллэрии, инфраструктураны сайыннарыы, олохтоох оҥорон таһаарыыны өйөөөһүн барыта тутулуктаах буолуоҕа.
Саҥа министиэристибэҕэ предпринимательство эйгэтин боломуочуйата барыта киирбитин таһынан, Федеративнай сыһыан министиэристибэтэ илдьэ сылдьыбыт тас дойду инвестициятын киллэрии, бэйэ оҥорон таһаарар бородууксуйатын өрөспүүбүлүкэ таһыгар таһаарыы боломуочуйата эмиэ бэриллиэҕэ. Экономика министиэристибэтиттэн судаарыстыба уонна чааһынайдар бииргэ үлэлээһиннэрэ, кластердары сайыннарыы, инвестиция, инновационнай сайдыы курдук хайысхалар эмиэ саҥа министиэристибэҕэ көстүлэр.
Егор Борисов бырабыыталыстыбаны кытары мунньахтыырыгар каадыр резервэтигэр баар дьону барыларын үөрэтэн көрөргө, ону сэргэ наада буоллаҕына, Россия үрдүнэн миниистир дуоһунаһыгар куонкурус биллэрэргэ сорудахтаабыта. Онон билигин куонкурус түмүгүн кэтэһэбит.
Аграфена КУЗЬМИНА.