Саҥа дьылы көрсө суруйааччы билиэтин туттулар

Бөлөххө киир:

Саха норуодунай бэйиэтэ Иван Мигалкин бэрэссэдээтэллээх Саха Өрөспүүбүлүкэтин Суруйааччыларын сойууһа сыл түмүктэрин таһаарар, кэлэр сылы торумнуур Саҥа дьыллааҕы бырааһынньыгы ыытара үтүө үгэскэ кубулуйда.

edersaas.ru

Соторутааҕыта сойуус чилиэннэрэ өрөспүүбүлүкэ араас улуустарыттан “Тээйэ” банкеттыыр саалаҕа муһуннулар.
Суруйааччылары сойуус бэрэссэдээтэлэ Иван Мигалкин, Афанасий Гуринов-Арчылан, Владислав Доллонов уо.д.а. эҕэрдэлээтилэр. Сыл түмүктэрин таһаарыы сиэринэн, айар үлэлэригэр ситиһиилээх, уопсастыбаннай үлэҕэ көхтөөх суруйааччылар бэлиэтиэннилэр.


Саха суруйааччыларын сойууһа тэриллибитэ 85 сылынан, Олег Сидоров салайааччылаах “Саха суруйааччылара” ассоциация Хайҕал суруктара Галина Фроловаҕа, Надежда Аржаковаҕа-Ивановаҕа, Александр Дунаевка, Лина Сабарайкинаҕа, Августина Хабароваҕа туттарылыннылар. Ону сэргэ, бэйиэттэр Мария Алексеева-Арылы Дуйдаах уонна Михаил Санников-Уол Сарсын  “СӨ култууратын туйгуна” үрдүк ааттары ыллылар.


Саха ыала ыалдьытымсаҕын кэрэһилээн, суруйааччылар эмиэ ыалдьыттара суох буолбатылар. Бу күн  “Бичик” кинигэ кыһатын генеральнай дириэктэрэ Август Егоров уонна сүрүн эрэдээктэр Валерий Луковцев кинилэри кытары ситимнээхтик үлэлиир суруйааччылары бэлиэтээтилэр. Ол курдук, Афанасий Гуринов-Арчылан, Михаил Иванов-Чуона Мэхээлэ, Надежда Егорова-Намылы, Иван Тарабукин-Талыман, Ульяна Бурнашева кинигэ кыһатын салалтатын Махтал суругун уонна “Бааттаах холбукатын” тутан үөрдүлэр-көттүлэр.


Бүгүҥҥү киэһэ биир ураты уонна долгутуулаах түгэнинэн сойууска саҥа чилиэннэри ылыы буолла. Ол курдук, СӨ Суруйааччыларын сойууһугар киирбиттэрин туоһулуур билиэттэри Дмитрий Пономарев (Ньурба улууһа), Иннокентий Иванов (Дьокуускай к.), Иннокентий Попов-Оҕуруоттаах (Уус Алдан), Елена Филатова-Сыгыйык (Таатта), Галина Иванова-Айтыына (Хаҥалас), Галина Борисова-Толбооно (Анаабыр), Евдокия Иннокентьена Попова-Аҋыына (Мэҥэ Хаҥалас) туттулар. Ону сэргэ, быйыл сойуус чилиэннэринэн  Айыына Ксенофонтова, Николай Туприн, Ульяна Босикова киирдилэр.

Суруйааччылары айар куттаах дьон диэн мээнэҕэ эппэттэрэ бу киэһэ эмиэ көһүннэ. Суруйар үлэлэрин таһынан талааннара таһымныыр дьон элбэҕэ сөхтөрдө уонна астыннарда. Галина Иванова-Айтыына “Саҥа дьыллааҕы вальс” ырыатынан, Виктор Стручков-Дуулаҕа Дьуһаал рок-толоруутунан, Эстрада тыйаатырын артыыһа Иван Тарасов уо.д.а. эҕэрдэлээтилэр. Эр дьоннор үгүстэрэ мас уустара, булт-алт абылаабыт дьоно буолаллара оҥорбут үлэлэригэр уонна викторина боппуруостарын сыысхала суох таайыыларыгар билиннэ. Чуолаан, Василий Гоголев-Уйулҕан бэргэһэни, уруучуканы, суотабай төлөпүөнү уурар, тымныы балыгы кыһар мас дуоска уо.д.а. курдук күннээҕи олоххо-дьаһахха олус наадаалаах тэриллэри оҥорбутун бириис быһыытынан туруоран, үгүс киһи махталын ылла.

Дьоро бырааһынньыгы СӨ Суруйааччыларын сойууһун чилиэннэрэ Августина Хабарова, Оксана Гаврильева-Айсаана уонна Василий Гоголев-Уйулҕан ылбаҕай ырыалары, хомоҕой хоһооннору, көрдөөх-нардаах нүөмэрдэрдэри дьүөрэлии тутан, бэрт сэргэхтик ыыттылар. Ону тэҥэ бэйэлэрин ааттарыттан сүрүн бириистэри туруордулар.


“Бу киэһэ курдук, бары бииргэ мустан, ханна баҕарар ааҕааччыларбытыгар тиийэн айар киэһэлэри, кэнсиэртэри, быыстапкалары тэрийиэххэ сөп эбит”, — диэн санаалаах суруйааччылар Сомоҕолоһуу сылын түмүктээтилэр.

Надежда ЕГОРОВА, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0