Бүгүн Саха сирин олохтоохторугар күүтүүлээх күммүт тиийэн кэллэ — Дьокуускай куорат киин болуоссаттарыгар Саҥа дьыллааҕы харыйалары сандаарыччы уматтылар.
edersaas.ru
«Кыһын Саха сириттэн саҕаланар» бэстибээл үөрүүлээхтик түмүктэннэ. Нэдиэлэ устата араас тэрээһиннэр ыытыллан, ону суруналыыстар хото сырдатан, быйыл дьон-сэргэ икки болуоссатынан хаһааҥҥытааҕар да толору муһуннулар. Таһырдьа тымныыта сүрдээх…
Саха сирин киин куоратын сүрүн болуоссатыгар Саҥа дьыллааҕы харыйаны уматыыга Ил Дархан Айсен Николаев кыттыыны ылла. Кини кэлэн иһэр Саҥа дьылынан өрөспүүбүлүкэ бары олохтоохторун истиҥник эҕэрдэлээн туран, дьиэ кэргэн бырааһынньыга үөрүүнү бэлэхтииригэр, кэлэр сыл ситиһиилээх буолуоҕун баҕарда. Тымныы Оҕонньору уонна Чысхааны — кыһыҥҥы остуоруйа дьоруойдарын оҕо-аймах илэ кэлбиттэрин көрөн, олуһун үөрдүлэр, долгуйдулар.
Салгыы Оржоникидзе болуоссатыгар Чысхаан доҕоругар Тымныы Оҕонньорго Тымныы символын туттарда. Ол аата Арассыыйаҕа бүгүҥҥүттэн тымныы сатыылыаҕа.
Бу туһунан Тымныы Оҕонньор анаан бэлиэтээтэ: «Билигин Арассыыйа куораттарыгар кыһыны билэ иликтэр. Бу Тымныы символын туппутунан мин дойду куораттарыгар Кыһын Саха сиригэр саҕаламмытын, онон Араассыыйаҕа дьиҥнээх кыһын кэлбитим биллэриэм».
Ол кэннэ Тымныы Оҕонньор: «Биир, икки, үс: Саҥа дьыллааҕы харыйа умай!» — диэтин кытта, харыйа уота Орджоникидзе болуоссаты киэргэтэн кэбистэ!
Киһи киһини кытта билсибэт, сүртэрсиэххин да син. Мин Ньурбаттан сылдьар эбээ сиэннэрин көрдүү сылдьарыгар түбэстим. Эбээ Саҥа дьыллааҕы харыйаны уматыыга сылдьыбытын, бу сылга олоҕор биир кэрэ түгэн буолбутун бэлиэтээтэ.
Ити курдук, Саҥа дьылы күүтэр дьоллоох кэм саҕаланна! Дьэрэкээн уотунан умайбыт харыйалар мантан инньэ ол ону санатардыы күн аайы дууһабытын угуттуохтара, туох эрэ үйэлээҕи оҥоро охсорго көҕүлүөхтэрэ.
Елена ПОТОЦКАЯ, «Саха сирэ» хаһыат, edersaas.ru
Хаартыска: Анатолий Шестаков уонна ааптар түһэриитэ, видеоҕа устуута.