Саҥа дьыллааҕы сүпсүлгэҥҥэ уоруйахтартан сэрэниҥ

Ааптар: 
Бөлөххө киир:

Саамай күүтүүлээх, алыптаах бырааһынньыкпыт чугаһаан, маҕаһыыннары, ырыынактары кэрийэн, бэлэх, ас-үөл атыылаһыыта саҕаланнаҕа. Хомойуох иһин, уоруйахтар сиэртибэлэрин «бултаһа» тахсар кэмнэрэ эмиэ үүннэҕэ.

edersaas.ru

Итинэн сибээстээн, «предупрежден — вооружен» диэн санаанан салайтаран, полиция сэрэхтээх уонна болҕомтолоох буоларга ыҥырар. Тоҕо диэтэр, чуолаан бу ахсынньы ыйга, Саҥа дьыллааҕы бырааһынньыкка бэлэмнэнэн сүүрүү-көтүү кэмигэр, уопсастыбаннай сирдэргэ (ырыынактарга, кууһунан атыылыыр базаларга, атыы-эргиэн кииннэригэр, оптуобустарга, тэрилтэлэр дьиэлэригэр уо.д.а) уоруу биллэ элбиир. Тыаттан куораттарга табаар, ас-таҥас атыылаһа киирээччи үксүүрүн уоруйахтар бэркэ диэн билэр буоллахтара.

Полиция бэлиэтииринэн, ырыынактарга, базаларга, үксүгэр, суоппар табаарын таһа сылдьар, аралдьыйбыт кэмигэр (аана аһаҕас буолан) биитэр массыына түннүгүн алдьатан уораллар. Эбэтэр хаһыа да буолан сылдьан, биирэ суоппары аралдьыппыта буолар кэмигэр, иккиһэ массыынаҕа туох баарын сойботон ылар.

Өссө биир ньыма: оннук биирдии малы, табаары уора сатаабакка, собуоттанан турар массыынаны күрэтэн бараллар. Онон, массыына аанын хатыы сылдьар биитэр киһини олордон хаалларар ордук.

Итинник сүпсүлгэн, сүүрүү-көтүү кэмигэр билбэт дьоҥҥун кытта кэпсэтэ сатыыр, дьон көрөрүгэр харчыгын ороон ааҕа турар наадата суох. Баан каартатын туттар ордук буолуо. Уонна тыаттан куоракка кэлээри сылдьан, тугу атыылаһа киирэргин, ол туһунан ыһа-тоҕо кэпсиир наадата суох.

Маны тэҥэ, оптуобустарга хармаанньыттар «тиллэллэр» — бу кэмҥэ дьон бары элбэх харчылаах сылдьарын билэллэр. Ол иһин, суумкаларгытын, бакыаттаргытын, кумааһынньыккытын, төлөпүөҥҥүтүн көрө-истэ сылдьыҥ.

Халлаан хараҥардаҕына, дьон элбэх, уоттаах-күөстээх, сырдык сирдэринэн сылдьа сатааҥ.

Полицейскайдар бу ахсынньы-тохсунньу ыйдарга күүһүрдүллүбүт эрэсииминэн үлэлииллэр, ол эбэтэр, уулуссаларга ботурууллар элбииллэр. Онон, аттыгытыгар көмүскэллээх курдук сананыҥ!

Биһиги корр., «Саха сирэ» хаһыат, edersaas.ru

Ойуу: интэриниэттэн.

+1
0
+1
0
+1
0
+1
0
+1
0
+1
0
+1
0