Саҥа дьылга тугу бэлэхтиир ордугуй?

Ааптар: 
Бөлөххө киир:

Кэлэр иһэр саҥа 2019 сылбыт илиҥҥи халаандарынан Сибиинньэ, буолаары буолан, араҕас дьүһүннээх Сир Сибиинньэтин сыла.

edersaas.ru


Сибиинньэ соруйан кыыллаабатахха, бэрт сытыары-сымнаҕас, аска-үөлгэ талымаһа суох, ол эрээри, айылҕатын быһыытынан сыылба соҕус, сороҕор сытарын сөбүлүүр, көрүүтүн таптахха, элбэх эти уонна халыҥ сыаны итиэннэ үгүс төрүөҕү биэрэр дьиэ кыыла. Онон кини сыла үп-харчы өттүнэн туруктаах буолууну таһынан оҕо-уруу төрөөһүнүн төлкөлүүр диэн билээччилэр бигэргэтэллэр.
Сыл бэлиэтэ хаһаайыстыбаннай, дьиэҕэ-уокка тардыстыылаах харамай, инньэ гынан Саҥа дьыллааҕы бэлэх күннээҕи олоххо-дьаһахха сыһыаннаах, туһалаах буолуохтаах. Биллэн турар, сыл бэлиэтинэн сувенир биир бастыҥ бэлэх ахсааныгар киириэҕэ.
Кыра оҕо барахсан минньигэс бэлэххэ ордук үөрүөҕэ, улаатан эрэр оҕоҕо бытархай харчыны мунньар сибиинньэ статуэтката олус наада, харчы халлаантан түспэтин биллин итиэннэ ааҕа-суоттуу, харыстыы, сыаналыы үөрэннин. Дьахтарга декоративнай косметиканы, туалетнай ууну чугас истиҥ киһитэ эрэ биэриэн сөп, оттон куукунаҕа туттуллар тэрили эбэтэр удамыр сыаналаах, сэмэй ювелирнай оҥоһугу бэлэхтиири сыл Хаһаайката бэркэ биһириэҕэ.
Эр киһиэхэ бытык хорунары, сытыы уһуктаах-биилээх тэрили, сыттаах парфюмерияны эбэтэр ис таҥаһы уунары Сибиинньэ бобор. Ол оннугар: “Үлэлээбитиҥ-хамсаабытыҥ үп-харчы буолан үрүлүйэ турдун!” — диэн көһүлүөгү биэриэххэ син эрээри, ол сибиинньэ тириититтэн оҥоһуллубут буолуо суохтаах. Кырдьаҕас киһиэхэ чаһыны, сиэркилэни бэриллибэт, сааһын санаппатын. Эгэ, эми-тому чугаһатыаҥ дуо? Бырааһынньыктааҕы бэлэх киһини чахчы үөрдүөхтээх, онон ким тугу ылыан баҕарарын эрдэттэн ыйытартан кыбыстар сатаммат.

Раиса СИБИРЯКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0